ဂျန်ဇက် (NSS) - ဩဂုတ် ၁၅

မြန်မာလက်ဝှေ့ချန်ပီယံဒေဝက ၎င်းအနေနဲ့ ကမ္ဘောဒီးယားဝန်ကြီးချုပ်အသစ် ဟွန်မာနက် နဲ့ လက်ဆွဲနှုတ်ဆက်ခွင့် ရလိုကြောင်း ထုတ်ဖော်ပြောဆိုလိုက်ပါတယ်။ 

ဒေဝ ဟာ ဒီနှစ်အကုန်မှာ ကမ္ဘောဒီးယားနိုင်ငံအတွင်း ဘက်စုံသုံး တိုက်ခိုက်ရေးပြိုင်ပွဲ ယှဉ်ပြိုင်ဖို့ ရှိနေပြီး ဝန်ကြီးချုပ်ဟွန်မာနက် နဲ့ လက်ဆွဲနှုတ်ဆက်ခွင့်ရလိုကြောင်း သတင်းထုတ်ပြန်ထားပါတယ်။

၎င်းက "ဒီနှစ်အကုန်မှာ ကျွန်တော်ဟာ ကမ္ဘောဒီးယားနိုင်ငံကို သွားရောက်မှာပါ။ ခမာ ဘက်စုံသုံးတိုက်ခိုက်ရေး ပြိုင်ပွဲယှဉ်ပြိုင်ဖို့ ကမ္ဘောဒီးယားနိုင်ငံကို လာရောက်မှာဖြစ်ပါတယ်။ ဒီပွဲစဉ်ဟာ အရှေ့တောင်အာရှ  နဲ့ ကမ္ဘောဒီးယားနိုင်ငံသမိုင်းမှာ အကြီးကျယ်ဆုံးပွဲစဉ်ဖြစ်လာမှာပါ" လို့ ပြောပါတယ်။ 

ကမ္ဘောဒီးယားနိုင်ငံ နဲ့ မြန်မာနိုင်ငံတို့ဟာ ရှေးဟောင်းအမွေအနှစ်ကြွယ်ဝချမ်းသာတဲ့နိုင်ငံတွေဖြစ်ကြောင်း၊ မြန်မာ လက်ဝှေ့ချန်ပီယံဖြစ်တဲ့ ကနေဒါနိုင်ငံသားဒေဝ က ပြောပါတယ်။ ဒေဝဟာ ဒီနှစ်အကုန်မှာ ယှဉ်ပြိုင်မယ့် ပွဲစဉ်အပြီးမှာ ကစားသမားဘဝကနေ အနားယူဖွယ်ရှိနေကြောင်း မကြာသေးမီက သတင်းထုတ်ပြန်ထားပါတယ်။

၎င်းက "ကမ္ဘောဒီးယားဝန်ကြီးချုပ်အသစ် ဟွန်မာနက်ဟာ ဘက်စုံသုံးတိုက်ခိုက်ရေးပြိုင်ပွဲကို နှစ်သက်တဲ့သူဆိုရင် ကျွန်တော်အတွက်တော့ ဂုဏ်ယူစရာပါ။ ကျွန်တော်ဟာ နိုင်ငံခြားသားတစ်ဦးဖြစ်ပေမယ့်လည်း ကမ္ဘောဒီးယားနိုင်ငံ ကို လေးစားမြတ်နိုးပါတယ်။ ဒါကြောင့် ကျွန်တော်ဟာ ကမ္ဘောဒီးယားရိုးရာအစဉ်အလာဖြစ်တဲ့ ခမာတိုက်ခိုက်ရေး စည်းကမ်းအတိုင်း ထိုးသတ်ဖို့ သဘောတူညီခဲ့တာပါ။ ကျွန်တော်ဟာ အဲဒီပွဲစဉ်အတွင်း ဝန်ကြီးချုပ် ဟွန်မာနက် နဲ့ လက်ဆွဲနှုတ်ဆက်ခွင့်ရလိုတယ်။ ဝန်ကြီးချုပ် ဟွန်မာနက်ဟာ ကျွန်တော်ရဲ့ဖိတ်ခေါ်ချက်ကို လက်ခံစဉ်းစားမယ်လို့ မျှော်လင့်ပါတယ်" လို့ လူမှုကွန်ရက်ကတဆင့် ကြေညာခဲ့ပါတယ်။ 

ကမ္ဘောဒီးယားဝန်ကြီးချုပ်ဟွန်မာနက်က "ကျွန်တော်ဟာ ဒီနှစ်အကုန်မှာ လက်ဝှေ့ဘုရင်တစ်ဦးဖြစ်တဲ့ ဒေဝနဲ့ တွေ့ဆုံဖို့ စောင့်ဆိုင်းနေမှာပါ။ ဒေဝဟာ ကမ္ဘောဒီးယားနဲ့ ခမာရိုးရာအစဉ်လာတွေကို နှစ်သက်မြတ်နိုးသူဖြစ်လို့ ကျေးဇူးတင်ပါတယ်" လို့ ပြောပါတယ်။