NSS - သြဂုတ် ၁၄

ရှမ်းပြည်နယ်၊ မူဆယ်မြို့ရှိ သမိုင်းဝင်ရှေးဟောင်းမြို့ရိုးအား TNLA အဖွဲ့ဝင်များက ဖြိုဖျက်ခဲ့မှုအပေါ် အပြင်းအထန်ဆန့်ကျင်ရှုတ်ချကြောင်း ရှမ်းပြည်တိုးတက်ရေးပါတီ(SSPP)က ကြေညာလိုက်သည်။

ရှမ်းလက်နက်ကိုင်အဖွဲ့တစ်ခုဖြစ်သော ရှမ်းပြည်တိုးတက်ရေးပါတီ(SSPP/SSA)က သြဂုတ်လ ၁၂ ရက်တွင် အထက်ပါကဲ့သို့ ထုတ်ပြန်ကြေညာခဲ့ခြင်းဖြစ်သည်။

မူဆယ်မြို့နယ်၊ စယ်လန့်ရှိ ရှမ်းဧကရာဇ်မင်းကြီး စဝ်ဆေခန်ဖလက်ထက် သမိုင်းဝင်ရှေးဟောင်းမြို့ရိုးကို သြဂုတ်လ ၇ ရက် ညနေပိုင်းတွင် PSLF/TNLA တပ်ဖွဲ့ဝင်များက ဘော်ဒိုဇာဖြင့် ဖြိုဖျက်ခဲ့ကြောင်း သိရှိရသည်ဟု SSPP ကပြောသည်။

ထို့ကြောင့် အဆိုပါလုပ်ရပ်ကို ရှမ်းပြည်တိုးတက်ရေးပါတီ(SSPP/SSA)က ပြင်းပြင်းထန်ထန်ဆန့်ကျင်ရှုတ်ချကြောင်း ထုတ်ပြန်ကြေညာထားသည်။

ထို့ပြင် အမျိုးသားပြန်လည်သင့်မြတ်ရေး၊ ပြည်ထောင်စုသားချင်းစုစည်းညီညွတ်ရေး အရေးတကြီးလုပ် ဆောင်ရန် လိုအပ်နေသည့်အချိန်တွင် အချင်းချင်းသွေးကွဲစေမည့် အပြုအမူများကို မလုပ်မိစေရန် အထူးသတိထားရမည်ဟု SSPP က ပြောသည်။

သမိုင်းရှေးဟောင်းအမွေအနှစ်များအား ဖျက်ဆီးသော လုပ်ဆောင်ချက်ကို လက်မခံနိုင်ကြောင်းနှင့် မည်သည့်ပုဂ္ဂိုလ်၊ မည်သည့်အဖွဲ့အစည်းက ပြုလုပ်သည်ဖြစ်စေ စာပေယဉ်ကျေးမှုနှင့်ထုံးတမ်းသမိုင်းစဉ်လာများကို မထေမဲ့မြင်မျက်ကွယ်ပြုသည့် လုပ်ဆောင်ချက်သာဖြစ်ကြောင်း ထုတ်ပြန်ချက်တွင် ဖော်ပြထားသည်။

ထို့ကြောင့် ရှမ်းဧကရာဇ်မင်းကြီး စဝ်ဆေခန်ဖလက်ထက် သမိုင်းဝင်ရှေးဟောင်းမြို့ရိုးအား ဖျက်ဆီးသည့်လုပ်ရပ်အပေါ် ရဟန်းရှင်လူပြည်သူများ ကျေနပ်မှုရှိစေရေး သက်ဆိုင်ရာတာဝန်ရှိ ပုဂ္ဂိုလ်၊ အဖွဲ့အစည်းများက ရှင်းလင်းပေးရန်လည်း ရှမ်းပြည်တိုးတက်ရေးပါတီက တောင်းဆိုထားသည်။

ပြီးခဲ့သော ရက်ပိုင်းများအတွင်းကလည်း တအာင်းလက်နက်ကိုင်အဖွဲ့ TNLA နှင့် တပ်မတော်တို့အကြား၌ မူဆယ်မြို့၊ စယ်လန့်ကျေးရွာအနီးတွင် တိုက်ပွဲများ ဖြစ်ပွားခဲ့ဖူးသည်။