ဂျန်ဇက် (NSS) - ဩဂုတ် ၁၃

ကမ္ဘာ့အချမ်းသာဆုံးပုဂ္ဂိုလ်တစ်ဦးဖြစ်တဲ့အီလွန်မတ်က ၎င်းနဲ့ ဇူကာဘတ်တို့ ယှဉ်ပြိုင်တိုက်ခိုက်မယ့်ပွဲစဉ်ကို အီတလီနိုင်ငံမှာ ကျင်းပဖွယ်ရှိနေကြောင်း ထုတ်ဖော်ပြောလိုက်ပါတယ်။

အီလွန်မတ်ဟာ Facebook တည်ထောင်သူ ဇူကာဘတ်နဲ့တိုက်ခိုက်မယ့်သတင်းတွေ အစောပိုင်းကတည်းက ထွက်ပေါ်ခဲ့ပေမယ့် လက်ရှိအချိန်အထိ တရားဝင်သဘောတူညီမှုမျိုး မရသေးကြောင်း သိရပါတယ်။

အီလွန်မတ်ကတော့ ဇူကာဘတ်နဲ့ တိုက်ခိုက်မယ့်ပွဲစဉ်ကို တွစ်တာလို့လူသိများတဲ့  X လူမှုကွန်ရက်ပလက်ဖောင်း မှာ ပြသပေးသွားမှာဖြစ်ကြောင်း သိရပါတယ်။ ဇူကာဘတ် နဲ့ အီလွန်မတ်တို့ ယှဉ်ပြိုင်ထိုးသတ်မယ့်ပွဲစဉ်ကို ရန်ပုံငွေ ရှာဖွေတဲ့ပုံစံမျိုး ကျင်းပဖို့ စီစဉ်နေတာဖြစ်ပြီး ပွဲစဉ်အမှန်တကယ်ဖြစ်လာမယ်ဆိုရင် ရန်ပုံငွေရှာဖွေပွဲ သမိုင်းမှာ ဝင်ငွေအများဆုံးရတဲ့ပွဲစဉ် ဖြစ်လာဖွယ်ရှိနေပါတယ်။ 

အီလွန်မတ်က "ကျွန်တော်ဟာ ဇူကာဘတ်နဲ့ ယှဉ်ပြိုင်ထိုးသတ်ဖြစ်မယ်ဆိုရင် အီတလီနိုင်ငံမှာ ကျင်းပနိုင်ဖို့ အီတလီဝန်ကြီးချုပ်အပြင် အီတလီကျန်းမာရေးဝန်ကြီးတို့နဲ့ တွေ့ဆုံဆွေးနွေးနေပါတယ်။ အီတလီဝန်ကြီးချုပ် ကလည်း လက်ခံသဘောတူညီထားတယ်" လို့ ပြောပါတယ်။ 

ဇူကာဘတ်ကလည်း "ကျွန်တော်ဟာ တိုက်ခိုက်ရေးပွဲတွေကို ချစ်ခင်မြတ်နိုးပါတယ်။ အီလွန်မတ် က ကျွန်တော်ကို စိန်ခေါ်ပြီးနောက်ပိုင်းကတည်းက သူနဲ့ထိုးသတ်ဖို့ အဆင်သင့်ရှိနေတယ်။ သူ့ဘက်က ထိုးသတ်မယ့်ရက်ကို အတိအကျသဘောတူညီမှုရခဲ့မယ်ဆိုရင် ကျွန်တော်ဘက်ကလည်း ထိုးသတ်နိုင်မယ့်ရက်ကို ပြန်ပြောမှာပါ" လို့ ပြောပါတယ်။

အီတလီယာဉ်ကျေးမှုရေးရာဝန်ကြီးက ၎င်းအနေနဲ့ အီလွန်မတ်နဲ့ဆွေးနွေးခဲ့ကြောင်း၊ သမိုင်းတစ်လျှောက် ဝင်ငွေ အများဆုံးရတဲ့ ရန်ပုံငွေပွဲမျိုးဖြစ်အောင် စီစဉ်ဖို့ ဆွေးနွေးခဲ့တာဖြစ်ပြီး ရောမမြို့မှာ ကျင်းပမှာ မဟုတ်ကြောင်း ပြောပါတယ်။ 

အီလွန်မတ်ဟာ ဇူကာဘတ် နဲ့ တိုက်ခိုက်မယ့်ပွဲစဉ်ကို ကမ္ဘာ့ရှေးဟောင်းအမွေနှစ်စာရင်းဝင်နေရာအဖြစ် သတ်မှတ် ခံထားရတဲ့ Colosseum မှာ ကျင်းပဖို့ စိတ်ဝင်စားနေကြောင်း သိရပါတယ်။ အီတလီယာဉ်ကျေးမှုဝန်ကြီး Sangiuliano က "အီလွန်မတ်နဲ့ ဇူကာဘတ်တို့ ထိုးသတ်မယ့်ပွဲစဉ်က ဝင်ငွေအများဆုံး ရရှိဖွယ်ရှိနေပါတယ်။ ယူရို သန်းချီ ရဖွယ်ရှိနေတယ်။ ရရှိတဲ့ ဝင်ငွေတွေကို အီတလီနိုင်ငံရှိ ကလေးဆေးရုံ နှစ်ခုမှာ လှူဒါန်းသွားမှာဖြစ်ပါတယ်" လို့ ပြောပါတယ်။