စော (NSS) - ဩဂုတ် ၁၁

မြန်မာနိုင်ငံ၌ လူမှုဖူလုံရေးစီမံကိန်းတွင် အကျုံးဝင်မြို့နယ်ပေါင်း (၁၁၉)မြို့နယ်ရှိလာပြီး အာမခံအလုပ် သမားပေါင်း (၁ ဒသမ ၂၂)သန်းကျော်ရှိလာကြောင်း သိရသည်။

လူမှုဖူလုံရေးအဖွဲ့ ညွှန်ကြားရေးမှူးချုပ်က ယမန်‌နေ့(ဩဂုတ်လ ၁၀ ရက်)တွင်ကျင်းပသော လူမှုဖူလုံရေးအဖွဲ့၏ အလုပ်အမှုဆောင်ကော်မတီအစည်းအဝေး (၁/၂၀၂၃) အစည်းအဝေးတွင် အထက်ပါကဲ့သို့ပြောကြားခဲ့ခြင်းဖြစ်သည်။

၎င်းတို့အတွက် ကျန်းမာရေးဝန်ဆောင်မှုပေးရန် နှင့် ငွေကြေးအကျိုးခံစားခွင့်များ ခွင့်ပြုထုတ်ပေးရန် ရည်ရွယ်၍ ရန်ကုန်မြို့ နှင့် မန္တလေးမြို့တို့တွင် အလုပ်သမားဆေးရုံကြီး (၃)ရုံဖွင့်လှစ်ထားကြောင်း သိရသည်။

ထို့ပြင် တိုင်း‌ဒေသကြီး၊ ပြည်နယ် အပါအဝင် ခရိုင်နှင့်မြို့နယ်တို့တွင် ရုံးပေါင်း (၁၀၀)၊ မြို့နယ်ဆေးခန်း (၉၆)ခန်း၊ တိုင်းရင်းဆေးခန်း တစ်ခန်းနှင့် ဌာနကြီးဆေးခန်း (၆၀)ခန်းတို့ကို ဖွင့်လှစ်ထားကြောင်း လူမှု ဖူလုံရေးအဖွဲ့ညွှန်ကြားရေးမှူးချုပ်က ပြောကြားခဲ့သည်။

အာမခံအလုပ်သမားများအတွက် ပိုမိုကောင်းမွန်သည့် ကျန်းမာ‌ရေးဝန်ဆောင်မှုများကို လက်လှမ်းမီရရှိနိုင်ရန်ရည်ရွယ်၍ Provider Purchaser Split (PPS) စနစ်အရ ပြင်ပပုဂ္ဂလ ဆေးခန်းများနှင့်ပူးပေါင်းခဲ့ကြောင်း သိရသည်။

ထို့သို့ ပူးပေါင်းခဲ့ပြီး fee for service payment ဖြင့် ဆေးခန်း (၁၄)ခန်းနှင့် capitation payment ဖြင့် ဆေးခန်း (၂၆)ခန်း၊ အမျိုးသမီးအာမခံအလုပ်သမားများ၏ မီးဖွားခြင်းဆိုင်ရာ ဝန်ဆောင်များအတွက် သားဖွားခန်း (၁၀)ခန်း နှင့် ရွေ့လျားဆေးကုသယာဉ် နှစ်စီးတို့ဖြင့် ကျန်းမာရေးဝန်ဆောင်မှုများဖြည့် ဆည်းပေးခဲ့ကြောင်း သိရသည်။