ယွန်း (NSS) - သြဂုတ် ၄

စားသောက်ဆိုင်လုပ်ငန်းရှင်များ အပါအဝင် လုပ်ငန်း(၄)မျိုးမှ ကောက်ခံရရှိသည့် ကုန်သွယ်လုပ်ငန်းခွန်များကို သက်ဆိုင်ရာအခွန်ရုံးများသို့ပေးသွင်းရန် ပြည်တွင်းအခွန်များဦးစီးဌာနက ထုတ်ပြန်ထားသည်။

စီမံကိန်း နှင့် ဘဏ္ဍာရေးဝန်ကြီးဌာန၊ ပြည်တွင်းအခွန်များဦးစီးဌာနမှ ယ‌နေ့(သြဂုတ်လ ၄ ရက်)ထုတ် နိုင်ငံပိုင်သတင်းစာတွင် အထက်ပါကဲ့သို့ အသိပေးထားခြင်းဖြစ်သည်။

စားသောက်ဆိုင်လုပ်ငန်းရှင်များ အပါအဝင် ဟိုတယ်နှင့် တည်းခိုခန်းလုပ်ငန်းရှင်များ၊ ရုပ်သံလွှင့်မီဒီယာလုပ်ငန်းရှင်များ၊ ရွှေထည်လက်ဝတ်ရတနာရောင်းချသည့်လုပ်ငန်းရှင်များ နှင့် လက်ကိုင်ဖုန်း(Handset)နှင့်ဆက်စပ်ပစ္စည်းများ ရောင်းချ/ဝန်ဆောင်မှုဆောင်ရွက်သည့် လုပ်ငန်းရှင်များအနေဖြင့် ကောက်ခံရရှိသည့် ကုန်သွယ်လုပ်ငန်းခွန်များကို သက်ဆိုင်ရာအခွန်ရုံးများသို့ပေးသွင်းရန် အသိပေးထားခြင်းဖြစ်သည်။

အဆိုပါ လုပ်ငန်းရှင်များသည် တည်ဆဲကုန်သွယ်လုပ်ငန်းခွန်စည်းမျဥ် ၄၀၊ စည်းမျဥ်းခွဲ(က)၊ စည်းမျဥ်းခွဲငယ်(၃)ပါ ပြဋ္ဌာန်းချက်နှင့်အညီ အခွန်အမှတ်တံဆိပ်ကပ်ထားသည့် ပြေစာဖြင့် ရောင်းရငွေ/ဝန်ဆောင်မှုရငွေနှင့်အတူ ကျသင့်သည့်ကုန်သွယ်လုပ်ငန်းခွင်ကို စားသုံးသူများ ထံမှ ကောက်ခံရန်တာဝန်ရှိကြောင်း သိရသည်။

ထို့နောက် ကောက်ခံရရှိသည့် အဆိုပါကုန်သွယ်လုပ်ငန်းခွန်များကို သက်ဆိုင်ရာအခွန်ရုံးများသို့ပေးသွင်းရန် ပြည်တွင်းအခွန်များဦးစီးဌာနက အသိပေးထုတ်ပြန်ထားသည်။

ပြေစာ(သို့မဟုတ်) ငွေလက်ခံရရှိကြောင်း အထောက်အထားများတွင် အခွန်အမှတ်တံဆိပ်ကပ်နှိပ်ရန် ပျက်ကွက်ခြင်းအား သတင်းပေးသူသည် စာရွက်စာတမ်းအထောက်အထားဖြင့်ဖြစ်စေ၊ အသံဖိုင်အထောက်အထားဖြင့်ဖြစ်စေ တင်ပြပါက သတင်းပေးသူအား တပ်ရိုက် သည့်ဒဏ်ကြေးငွေ၏ ၃၀ ရာခိုင်နှုန်းကို ဆုကြေးအဖြစ်ချီးမြှင့်သွားမည်ဖြစ်ကြောင်း ထုတ်ပြန်ချက်တွင်ပါရှိသည်။

ထို့ပြင်  လက်ကိုင်ဖုန်းများပေါ်၌ သတ်မှတ်ချက်များနှင့်အညီ အခွန်အမှတ်တံဆိပ်ကပ်ရန် ပျက်ကွက်ခြင်းကို သတင်းပေးသူအား ၂၀ ရာခိုင်နှုန်း ဆုကြေးငွေအဖြစ် ချီးမြှင့်မည်ဖြစ် ကြောင်း သိရသည်။

ထို့ကြောင့် စားသုံးသူပြည်သူများအနေဖြင့် အထက်ပါလုပ်ငန်းရှင်များထံမှ ကျသင့်ငွေပေးချေချိန်တွင် အခွန်အမှတ်တံဆိပ်ကပ်ထားသည့် ပြေစာကိုတောင်းယူရန် ပြည်တွင်းအခွန်များဦးစီးဌာနမှ အသိပေးထုတ်ပြန်ထားသည်။

ထို့ပြင် လုပ်ငန်းရှင်များအနေဖြင့်လည်း စားသုံးသူကတောင်းခံသည်ဖြစ်စေ၊ မတောင်းခံသည်ဖြစ်စေ အခွန်အမှတ်တံဆိပ်ကပ်ထားသည့် ပြေစာများကို မဖြစ်မနေထုတ်ပေးရန် ထည့်သွင်းထုတ်ပြန်ထားသည်။