NSS - ဩဂုတ် ၄

တနင်္သာရီတိုင်း၊ ဘုတ်ပြင်းမြို့နယ်ရှိ မိသားစု(၃)ဦးကို PDF အဖွဲ့မှ သေနတ်ဖြင့်ပစ်သတ်မှုကြောင့် (၂)ဦးသေဆုံး တစ်ဦးဒဏ်ရာရရှိခဲ့ကြောင်း မြန်မာနိုင်ငံရဲတပ်ဖွဲ့မှ သတင်းထုတ်ပြန်ထားသည်။

ဖြစ်စဉ်မှာ ပြီးခဲ့သော ဩဂုတ်လ ၁ ရက်၊ ည ၉နာရီခွဲအချိန်တွင် ဘုတ်ပြင်းမြို့နယ်၊ ဘုတ်ပြင်းကျေးရွာအနီး၌ အထက်ပါကဲ့သို့ ဖြစ်ပွားခဲ့ကြောင်း သိရသည်။

အဆိုပါ ဘုတ်ပြင်းကျေးရွာအနီး၊ ဥယျာဉ်ခြံအတွင်းရှိ နေအိမ်၌ နေထိုင်သည့် မိသားစု(၃)ဦးအား PDF အင်အား(၂)ဦးခန့်ကရောက်ရှိလာပြီး သေနတ်ဖြင့်ပစ်ခတ်ခဲ့ကြောင်း ရဲတပ်ဖွဲ့မှ ထုတ်ပြန်ထားသည်။

ထိုသို့ သေနတ်ဖြင့် ပစ်ခတ်မှုကြောင့် ဘုတ်ပြင်းကျေးရွာနေ ဦးခင်မောင်လွင်(၆၈)နှစ်နှင့် ၎င်း၏ ဇနီးဖြစ်သူ ဒေါ်မြင့်ခိုင် (၅၈)နှစ်တွင် ရင်ဘက်ကျည်ထိမှန်ဒဏ်ရာများရရှိကာ အခင်းဖြစ်ပွားရာနေရာ၌ သေဆုံးသွားခဲ့ပြီး သားဖြစ်သူ ကိုကျော်ကျော်လွင်(၂၄)နှစ်တွင် ယာပါးစောင်းကျည်ရှပ်ထိဒဏ်ရာ တစ်ချက်ရရှိခဲ့ကြောင်း သိရသည်။

အထက်ပါဖြစ်စဉ်မှ အကြောင်းမဲ့လုပ်ကြံသတ်ဖြတ်မှုကျူးလွန်ခဲ့သည့် အကြမ်းဖက်သမားများအား ဖော်ထုတ်ဖမ်းဆီး၍ ဥပဒေနှင့်အညီအပြစ်ပေးအရေးယူနိုင်ရေးလုံခြုံရေးတပ်ဖွဲ့ဝင်များက ဆက်လက်လုပ်ဆောင်လျက်ရှိကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားသည်။