ဂျန်ဇက် (NSS) - သြဂုတ် ၂

နိုင်ဂျာနိုင်ငံမှာ ပြီးခဲ့တဲ့သီတင်းပတ်က စစ်အာဏာသိမ်းမှုဖြစ်ပွားခဲ့ပြီးနောက် ဥရောပနိုင်ငံများဟာ နိုင်ဂျာနိုင်ငံရှိ ၎င်းတို့နိုင်ငံသားများကို ပြန်လည်ခေါ်ယူဖို့ စီစဉ်နေချိန်မှာပဲ စပိန်အစိုးရကလည်း နိုင်ဂျာနိုင်ငံကိုရောက်ရှိနေတဲ့ စပိန်နိုင်ငံသား၇၀ကို လေကြောင်းခရီးစဉ်နဲ့ပြန်လည်ခေါ်ယူသွားမယ်လို့ ဆိုပါတယ်။ 

နိုင်ဂျာနိုင်ငံမှာ အာဏာသိမ်းမှုဖြစ်ပွားခဲ့ပြီးနောက်ပိုင်း အနောက်အာဖရိကနိုင်ငံများအဖွဲ့က ရွေးကောက်ခံသမ္မတ ကို ရာထူးပြန်လည်ခန့်ထားဖို့ နဲ့ စစ်အာဏာသိမ်းခေါင်းဆောင် ဗိုလ်ချုပ်ကြီး Mohamed Bazoum ကို ရာထူးက ဆင်းပေးဖို့ တောင်းဆိုထားပြီး တောင်းဆိုချက်ကို မလိုက်နာဘူးဆိုရင် စစ်ရေးနည်းလမ်းအသုံးပြုမယ်လို့ ပြီးခဲ့တဲ့ ရက်ပိုင်းက သတိပေးခဲ့ရာ တင်းမာမှုများ ပိုမိုဖြစ်လာခဲ့ပါတယ်။ 

နိုင်ဂျာနိုင်ငံရဲ့အိမ်နီးချင်းနိုင်ငံတွေဖြစ်တဲ့ မာလီနဲ့ ဘာကီနာဖာဆိုနိုင်ငံတို့ရဲ့စစ်ခေါင်းဆောင်တွေကလည်း နိုင်ဂျာကို စစ်ရေးအရ အရေးယူခြင်းဟာ ၎င်းတို့နိုင်ငံတွေအပေါ် စစ်ကြေညာခြင်းအဖြစ် မှတ်ယူသွားမှာဖြစ်ပြီး နိုင်ဂျာပြည်သူ တွေကို ကာကွယ်ပေးသွားမှာဖြစ်ကြောင်း သတိပေးထားပါတယ်။ 

စပိန်နိုင်ငံခြားရေးဝန်ကြီးဌာနက နိုင်ဂျာနိုင်ငံရဲ့လုံခြုံရေးအခြေအနေတွေက စိုးရိမ်စရာကောင်းနေကြောင်း ပြောပါ တယ်။ နိုင်ဂျာစစ်အာဏာသိမ်းအုပ်စုဟာ နိုင်ငံလေကြောင်းပိုင်နက်ကို ပိတ်လိုက်တဲ့အပြင် ပြည်ပလေကြောင်း ခရီးစဉ်တွေကို ဆိုင်းငံလိုက်ပြီးနောက်  ပြင်သစ်အစိုးရ နဲ့ အခြားဥရောပသမဂ္ဂအဖွဲ့ဝင်နိုင်ငံတွေဟာ နိုင်ဂျာနိုင်ငံကို ရောက်ရှိနေတဲ့ ၎င်းတို့နိုင်ငံသားတွေကို ပြန်လည်ခေါ်ယူဖို့ စီစဉ်နေပါတယ်။ 

အီတလီအစိုးရကလည်း ၎င်းတို့အနေနဲ့ နိုင်ဂျာနိုင်ငံရှိ အီတလီနိုင်ငံသားတွေကို ပြန်ခေါ်ယူဖို့ အထူးလေယာဉ် လွှတ်သွားမယ်လို့ သတင်းထုတ်ပြန်ထားပါတယ်။ ဗြိတိန်အစိုးရကလည်း နိုင်ဂျာနိုင်ငံရှိ ဗြိတိန်နိုင်ငံသားတွေကို အပြင်မထွက်ဘဲ အိမ်ထဲမှာသာနေထိုင်ဖို့ နဲ့ ရောက်ရှိနေတဲ့နေရာတွေကို အကြောင်းကြားပေးဖို့ သတင်း ထုတ်ပြန်ထားပါတယ်။

ဒါပေမယ့် ဗြိတိန်အစိုးရဟာ နိုင်ဂျာနိုင်ငံရောက် ဗြိတိန်နိုင်ငံသားတွေကို ပြန်လည်ခေါ်ယူသွားမယ်ဆိုတဲ့အချက် ကိုတော့ သတင်းထုတ်ပြန်ခြင်းမျိုးမရှိသေးကြောင်း သိရပါတယ်။ အမေရိကန်အစိုးရကတော့ ၎င်းတို့အနေနဲ့ လက်ရှိအချိန်မှာ နိုင်ဂျာနိုင်ငံအတွင်းရှိ အမေရိကန်နိုင်ငံသားတွေကို ပြန်လည်ခေါ်ယူဖို့ အစီအစဉ်မရှိသေးကြောင်း ဆိုထားပါတယ်။