စော (NSS) - ဇူလိုင် ၃၁

အားကစားနှင့် ကာယပညာဦးစီးဌာနတွင် လစ်လပ်လျက်ရှိသော ဒုကြီးကြပ်ရေးမှူးနှင့် နည်းပြရာထူးလျှောက်လွှာများခေါ်ယူနေကြောင်း သိရသည်။

အားကစားနှင့် ကာယပညာဦးစီးဌာနမှ ယနေ့(ဇူလိုင်လ ၃၁ ရက်)ထုတ် နိုင်ငံပိုင်သတင်းစာများတွင် အထက်ပါကဲ့သို့ အသိပေးကြေညာထားခြင်းဖြစ်သည်။

အဆိုပါ ရာထူး(၂၅)နေရာ အနက် နည်းပြနေရာအတွက်  (၁၅)နေရာ၊ စာရင်းကိုင် (၂)နေရာအတွက် (၅)နေရာနှင့် ဒုကြီးကြပ်ရေးမှူး(ထိန်းသိမ်းရေး)နေရာအတွက် (၅)နေရာတို့ကို ခေါ်ယူသွားမည်ဖြစ်ကြောင်း သိရသည်။

လျှောက်ထားလိုသူများသည် လျှောက်လွှာပိတ်သည့်နေ့တွင် အသက်(၃၀)နှစ်ထက်မကျော်ရန်လိုအပ်ပြီး ဝန်ထမ်းဖြစ်ပါက အသက်(၃၅)နှစ်မကျော်လွန်သူဖြစ်ရန်လိုကြောင်း ထုတ်ပြန်ချက်တွင်ပါရှိသည်။

လျှောက်လွှာများကို ဩဂုတ်လကုန်တွင် နောက်ဆုံးထား၍ အားကစားနှင့် လူငယ်ရေးရာဝန်ကြီးဌာန၊ ရုံးအမှတ် (၃၁)သို့ လျှောက်ထားရမည်ဖြစ်ပြီး အစိုးရဌာနတစ်ခုခုတွင် ချိန်နှုန်းလစာနှင့် တာဝန်ထမ်းဆောင်နေသူများသည် သက်ဆိုင်ရာဌာနမှတစ်ဆင့် လျှောက်ထားရမည်ဖြစ်ကြောင်း သိရသည်။

ထို့ပြင်လျှောက်ထားသူများသည် အားကစာဆိုင်ရာ၊ အင်္ဂလိပ်စာနှင့် အထွေထွေဗဟုသုတဘာသာရပ်များကို ရေးဖြေစာမေးပွဲဖြေရဆိုရမည်ဖြစ်ကြောင်း ထုတ်ပြန်ချက်အရသိရသည်။

နည်းပြရာထူးအတွက် ရေးဖြေစာမေးပွဲအောင်မြင်သူများကို အားကစားနှင့်ကြံ့ခိုင်စွမ်းရည်စစ်ဆေး၍  လူတွေ့စာမေးပွဲဖြေဆိုခွင့်ပြုမည်ဖြစ်ပြီး ကျန်ရာထူးများအတွက် ရေးဖြေအောင်မြင်ပြီးသူများကိုသာ လူတွေ့စာမေးပွဲဖြေဆိုခွင့်ပြုမည်ဖြစ်ကြောင်း ထုတ်ပြန်ထားသည်။