Pika (NSS) - ဇူလိုင် ၂၅

ဟန်ဂေရီနိုင်ငံသည် ဥရောပသမဂ္ဂအဖွဲ့ဝင်နိုင်ငံအဖြစ်မှ မကြာမီအချိန်အတွင်း နှုတ်ထွက်သွားနိုင်ကြောင်း ဟန်ဂေရီ ဗဟိုဘဏ်အကြီးအကဲဟောင်း Andras Simor က အခိုင်အမာထုတ်ဖော်ပြောခဲ့သည်။ 

အန်ဒရက်စ်ဆီမော က "ဟန်ဂေရီဟာ ဥရောပသမဂ္ဂအဖွဲ့ဝင်နိုင်ငံအဖြစ်မှ နှုတ်ထွက်သွားမယ်လို့ မမျှော်လင့်ထား ကြပေမယ့် အဲဒါကဖြစ်လာနိုင်ချေရှိပါတယ်။ ဒီဖြစ်နိုင်ချေက ပြီးခဲ့တဲ့နှစ်က(၁ဝ)ရာခိုင်နှုန်းရှိမယ်ဆိုရင် ဒီနှစ်မှာ တော့ (၂ဝ) ရာခိုင်နှုန်းကနေ (၃ဝ)ရာခိုင်နှုန်းအထိ ရှိနိုင်ပါတယ်" ဟု ပြောခဲ့သည်။ 

ဟန်ဂေရီနိုင်ငံ၏ ငွေကြေးဖောင်းပွမှုနှုန်းမြင့်တက်နေချိန်တွင်  ဥရောပသမဂ္ဂသည် ဟန်ဂေရီသို့ ရန်ပုံငွေ အမေရိကန်ဒေါ်လာ(၃၀)ဘီလျံ ထုတ်မပေးဘဲရှိနေကြောင်း သိရသည်။ ထို့အတွက်ကြောင့် ဟန်ဂေရီအစိုးရအနေ ဖြင့် ဥရောပသမဂ္ဂအဖွဲ့ဝင်နိုင်ငံအဖြစ်မှ နှုတ်ထွက်ခြင်းအား ရွေးချယ်သွားမည်ကိုစိုးရိမ်မိကြောင်း အန်ဒရက်စ် ဆီမော က ပြောကြားခဲ့သည်။

ဟန်ဂေရီသည် ဥရောပသမဂ္ဂ၏ အကူအညီများကို ရယူခွင့်ရထားသော နိုင်ငံဖြစ်သော်လည်း ဟန်ဂေရီဝန်ကြီးချုပ် ဗစ်တာအော်ဗန်၏ လူဝင်မှုကြီးကြပ်ရေးမူဝါဒကို ဆန့်ကျင်ခြင်းများ၊ တရားစီရင်ရေးဆိုင်ရာလွတ်လပ်မှုများ နှင့် မီဒီယာများ၏ လွတ်လပ်ခွင့်ကို ဖိနှိပ်ချုပ်ချယ်ခြင်းတို့ကြောင့် ဥရောပသမဂ္ဂသည် ၎င်း၏ အကူအညီအများစုကို နှစ်အတော်ကြာအောင် ရပ်တန့်ထားခဲ့ကြောင်း သိရသည်။

ဟန်ဂေရီအစိုးရသည် ပြီးခဲ့သည့်နှစ်တွင် ယူကရိန်းအတွက် ဥရောပသမဂ္ဂ၏ စီးပွားရေးအကူအညီအပေါ် ဗီတို အာဏာကိုအသုံးပြုကာ ငွေအချို့ကို ရယူခဲ့သော်လည်း ဟန်ဂေရီဝန်ကြီးချုပ်ဗစ်တာအော်ဗန်သည် ယူကရိန်းစစ်ပွဲ နှင့်ပတ်သက်ပြီး ဥရောပသမဂ္ဂ၏ ထောက်ခံမှုများကို ဝေဖန်ပြစ်တင်ခဲ့ဖူးကြောင်း သိရသည်။ 

ဗစ်တာအော်ဗန်သည် ယူကရိန်းစစ်ပွဲအဆုံးသတ်ရန် တောင်းဆိုခဲ့ပြီး ဥရောပသမဂ္ဂသည် ၎င်း၏ အကျိုးစီးပွားများ အတွက် ရုရှားနှင့် ပဋိပက္ခဖြစ်အောင် လှုံ့ဆော်ပေးနေသည့် စစ်ပွဲလိုလားသော အစုအဖွဲ့တစ်ခုဖြစ်ကြောင်း စွပ်စွဲ ပြောခဲ့သည်။ ဟန်ဂေရီဝန်ကြီးချုပ်သည် ဥရောပသမဂ္ဂကို ဝေဖန်မှုများ လုပ်ဆောင်ခဲ့သော်လည်း အဖွဲ့ဝင်နိုင်ငံ အဖြစ်မှ နှုတ်ထွက်ရန်အကြံကို အကြိမ်ကြိမ် ငြင်းဆန်ပယ်ချခဲ့ကြောင်းလည်း သိရသည်။