NSS - ဇူလိုင် ၂၃

နှစ်သောင်းကျပ်တန် ငွေစက္ကူအမျိုးအစားသစ်ကို ယခု ဇူလိုင်လ ၃၁ ရက်တွင် ထုတ်ဝေသုံးစွဲမည်ဟု မြန်မာနိုင်ငံတော်ဗဟိုဘဏ်က ကြေညာလိုက်သည်။

ဗဟိုဘဏ်က ယနေ့(ဇူလိုင်လ ၂၃ ရက်)တွင် အထက်ကဲ့ပါသို့ အသိပေး ကြေညာခဲ့ခြင်းဖြစ်သည်။ 

အဆိုပါ နှစ်သောင်းကျပ်တန်ငွေစက္ကူအမျိုးအစားသစ်ကို မာရဝိဇယ ဗုဒ္ဓရုပ်ပွားတော်မြတ်ကြီး တည်ဆောက်ပြီးစီးမှု အထိမ်းအမှတ်နှင့် ဆင်ဖြူ တော် ရဋ္ဌနန္ဒက၏ တစ်နှစ်မြောက်မွေးနေ့အထိမ်းအမှတ်အဖြစ်ထုတ်ဝေခြင်းဖြစ်ကြောင်း ဗဟိုဘဏ်က ပြောသည်။ 

၎င်းငွေစက္ကူအမျိုးအစားသစ်ကို အရေအတွက် အကန့်အသတ်ဖြင့်သာ ထုတ်ဝေသွားမည်ဖြစ်ပြီး မြန်မာနိုင်ငံတွင်း ထုတ်ဝေသုံးစွဲနေသော ငွေစက္ကူများအနက် ဟောင်းနွမ်းပြီးသုံးစွဲရန်မသင့်သည့် ငွေစက္ကူများနှင့် တန်ဖိုးတူ လဲလှယ်ပေးခြင်းဖြင့်သာ ဖြန့်ဝေပေးသွားမည်ဟု ဗဟိုဘဏ်ကကြေညာထားသည်။ 

ကနဦးအနေဖြင့် မြန်မာနိုင်ငံတော် ဗဟိုဘဏ် နေပြည်တော်၊ ရန်ကုန်နှင့်မန္တလေးဘဏ်ခွဲတို့၌ ဟောင်းနွမ်းငွေစက္ကူများနှင့်တန်ဖိုးတူ နှစ်သောင်းကျပ်တန် အမျိုးအစားသစ်ဖြင့်လဲလှယ်ပေးမည် ဖြစ်ကြောင်းသိရသည်။

နှစ်သောင်းကျပ်တန်ငွေစက္ကူအမျိုးအစားသစ်သည် အလျား ၁၅စင်တီမီတာနှင့် အနံ ၇ စင်တီမီတာ ရှိပြီး အရောင်းမှာ အစိမ်းနုရောင်ဖြစ်ကြောင်းသိရသည်။ 

ထို့ပြင် နှစ်သောင်းကျပ်တန်ငွေစက္ကူ၏ မျက်နှာစာဘက် ထိပ်ပိုင်း၌ မြန်မာ နိုင်ငံတော်ဗဟိုဘဏ်စာတန်းရိုက်နှိပ်ထားပြီး ရတနာဆင်ဖြူတော်ပုံ အပါအဝင် ငွေစက္ကူတန်ဖိုးကို မြန်မာ စာသားများဖြင့် ရိုက်နှိပ်ထားကြောင်း သိရသည်။ 

အလားတူ နှစ်သောင်းကျပ်တန်ငွေစက္ကူ၏ ကျောဘက်၌ စစ်ကိုင်းတံတားပုံနှင့် ဧရာဝတီတံတား(ရတနာပုံ)အား ထည့်သွင်းရိုက်နှိပ်ထား ကြောင်းသိရသည်။ 

၎င်းငွေစက္ကူအမျိုးအစားသစ်၌ အမြင်အာရုံချို့ယွင်းသူများ အထိအတွေ့ဖြင့်အာရုံခံသိရှိနိုင်သော မျဉ်းတို ၁၂ ချောင်းစီကိုလည်း ထည့်သွင်းရိုက်နှိပ်ထားကြောင်းသိရသည်။