ယွန်း (NSS) - ဇူလိုင် ၂၂

နေပြည်တော် အပါအဝင် စာစစ်ဌာန(၈)ခုမှ အောင်မြင်ထားသူများ အမျိုးသားယဥ်ကျေးမှုနှင့် အနုပညာတက္ကသိုလ် (မန္တလေး)၏ ပထမနှစ်ဝင်ခွင့်ကို လျှောက်ထားနိုင်ကြောင်း သိရသည်။

အမျိုးသားယဥ်ကျေးမှုနှင့် အနုပညာတက္ကသိုလ်(မန္တလေး)မှ ယနေ့ နိုင်ငံပိုင်သတင်းစာတွင် အထက်ပါကဲ့သို့ အသိပေး ထုတ်ပြန်ထားခြင်းဖြစ်သည်။

၂ဝ၂၃-၂ဝ၂၄ ပညာသင်နှစ်အတွက် အမျိုးသားယဥ်ကျေးမှုနှင့် အနုပညာတက္ကသိုလ်(မန္တလေး) ပထမနှစ်သင်တန်း ကျောင်းအား တက္ကသိုလ်ဝင်စာမေးပွဲ၌ မည်သည့်ဘာသာတွဲဖြင့်မဆို အောင်မြင်ထားပြီး အနုပညာဝါသနာပါသူများ လျှောက်ထားနိုင်ကြောင်း သိရသည်။

အဆိုပါ ပထမနှစ်သင်တန်းတွင် ဂီတပညာအထူးပြု အပါအဝင် သဘင်ပညာအထူးပြု၊ ပန်းချီပညာအထူးပြု၊ ပန်းပု ပညာအထူးပြု၊ ရုပ်ရှင်နှင့် ပြဇာတ်ပညာအထူးပြုဘာသာရပ်များကို သင်တန်းကာလ(၄)နှစ်ဖြင့် သင်ကြားပေးသွား မည်ဖြစ်ကြောင်း ထုတ်ပြန်ထားသည်။

နေပြည်တော် အပါအဝင် မန္တလေး၊ မကွေး၊ စစ်ကိုင်း၊ ကချင်၊ ကယား၊ ချင်းနှင့် ရှမ်းတို့ရှိ စာစစ်ဌာနများမှ အောင်မြင်ခဲ့သူများသည် အမျိုးသားယဥ်ကျေးမှုနှင့် အနုပညာတက္ကသိုလ်(မန္တလေး)ကို လျှောက်ထားတက်ရောက် ကြရမည်ဖြစ်ကြောင်း ထုတ်ပြန်ချက်အရ သိရသည်။

လျှောက်လွှာပုံစံများကို အမျိုးသားယဥ်ကျေးမှုနှင့် အနုပညာတက္ကသိုလ်(မန္တလေး)၊ ရွှေစာရံဘုရားလမ်း၊ အုန်းချော ကျေးရွာ၊ ပုသိမ်ကြီးမြို့ နယ်တွင် ဝယ်ယူလျှောက်ထားနိုင်ကြောင်း သိရသည်။

လျှောက်လွှာများကို လာမည့်အောက်တိုဘာ(၁၇)ရက်တွင် နောက်ဆုံးလျှောက်ထားရမည်ဖြစ်ကြောင်း သိရပြီး အောက်တိုဘာ(၂၃)ရက်တွင် လူတွေ့စစ်ဆေးမည်ဖြစ်ကြောင်း ထုတ်ပြန်ထားသည်။

ထို့နောက် ဝင်ခွင့်ရစာရင်းကို အောက်တိုဘာလ(၂၆)ရက်တွင် သင်တန်းရေးရာဌာန ကြော်ငြာသင်ပုန်းတွင် ကြေညာ၍ ကျောင်းအပ်လက်ခံသွားမည်ဖြစ်ကြောင်း သိရသည်။

၂ဝ၂၃-၂ဝ၂၄  တက္ကသိုလ်ပညာသင်နှစ်အား နိုဝင်ဘာ(၁)ရက်နေ့တွင် စတင်ဖွင့်လှစ်သွားမည်ဖြစ်ကြောင်း ထည့်သွင်းထုတ်ပြန်ထားသည်။