ပုံစာ - ရုပ်သံလိုင်းများတွင် တင်ဆက်ပြသခဲ့သည့် မြန်မာရုပ်သံဇာတ်လမ်းတွဲ အချို့အားတွေ့ရစဉ်

ယွန်း (NSS) -  ဇူလိုင် ၂၁

လာမည့် သြဂုတ်လ(၁)ရက်မှစ၍ ဇာတ်လမ်းတွဲများ မရိုက်ကူးမီ ဇာတ်လမ်းအကျဥ်း နှင့် အခန်းစဥ်များကို ဗီဒီယိုဆင်ဆာအဖွဲ့သို့ တင်ပြရမည်ဖြစ်ကြောင်း မြန်မာနိုင်ငံရုပ်ရှင်အစည်းအရုံးမှ ထုတ်ပြန်ထား သည်။

မြန်မာနိုင်ငံရုပ်ရှင်အစည်းအရုံးမှ ယနေ့(ဇူလိုင်လ ၂၁ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ရုပ်မြင်သံကြားလုပ်ငန်းလုပ်ကိုင်သူများနှင့် ထုတ်လုပ်သူများအနေဖြင့် မြန်မာဇာတ်လမ်းတွဲများ မရိုက် ကူးမီ ဇာတ်လမ်း နှင့် ခွင့်ပြုချက်ရယူရေးအတွက် ဇာတ်လမ်းအကျဥ်း နှင့် အခန်းစဥ်များကို ဗီဒီယိုဆင်ဆာအဖွဲ့သို့ တင်ပြရမည်ဖြစ်ကြောင်း ထုတ်ပြန်ထားသည်။

အဆိုပါ ထုတ်ပြန်ချက်ကို ပြန်ကြာ‌ရေးနှင့် ပြည်သူ့ဆက်ဆံရေးဦးစီးဌာနမှ အကြောင်းကြားထားခြင်းဖြစ်ကြောင်း သိရသည်။

“အရင်ထဲက ရိုက်ကူးခွင့်တင်ရပါတယ်။ အခုက ပြန်ကြားရေးကထုတ်လိုက်တာပါ။ ကျွန်တော်တို့ဘက်က ထုတ်ထားတာက ရုပ်ရှင်ကားဆိုရင် ရုပ်ရှင်ရိုက်ကူးခွင့်တင်ပြီးရင် ဆင်ဆာရှိလို့ရှိရင် ဆင်ဆာထောက်ခံချက်ပေးရတယ်။ ရိုက်ကူးခွင့်နဲ့ထောက်ခံချက်ပေးရတယ်။ အခုကတော့ ညွှန်ကြားချက်အတိုင်းလုပ်ရမှာပေါ့”ဟု မြန်မာနိုင်ငံရုပ်ရှင်အစည်းအရုံး ဒုဥက္ကဋ္ဌ ဦးအေးကြူလေးက NP News ကိုပြောသည်။

ထို့ကြောင့် ရုပ်မြင်သံကြားလုပ်ငန်း လုပ်ကိုင်သူများနှင့် ထုတ်လုပ်သူများအနေဖြင့် မြန်မာဇာတ်လမ်းတွဲများ မရိုက်ကူးမီ ဇာတ်လမ်းအကျဥ်း နှင့် အခန်းစဥ်များကို ဗီဒီယိုဆင်ဆာအဖွဲ့သို့ သြဂုတ်လ(၁)ရက်မှစ၍ ကြိုတင် တင်ပြနိုင်ရန် မြန်မာနိုင်ငံရုပ်ရှင်အစည်းအရုံးမှ အသိပေးထားသည်။

ဗီဒီယိုဆင်ဆာအဖွဲ့သို့ ဇာတ်လမ်းတင်ပြခြင်းမရှိဘဲ ရိုက်ကူးထားသော ရုပ်သံဇာတ်လမ်းတွဲများကို တင်ပြလာပါက ဆင်ဆာကြည့်ရှုစစ်ဆေးခြင်းကို ဆောင်ရွက်ပေးမည်မဟုတ်ကြောင်း ထုတ်ပြန်ချက်တွင် ထည့်သွင်းဖော်ပြထားသည်။