ယွန်း (NSS) - ဇူလိုင် ၁၉

ပုပ္ပါးတောင်ဒေသကို UNESCO စာရင်းတင်သွင်းနိုင်ရေးအတွက် သဘောသဘာဝမတူညီသည့် ဘူမိနယ်မြေအသစ်များကို ထပ်မံဖော်ထုတ်သွားရန် ပြည်ထောင်စုဝန်ကြီးက အသိပေးပြောကြားခဲ့သည်။

သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးခင်မောင်ရီက ဇူလိုင်လ(၁၈)ရက်၌ သစ်တောဦးစီးဌာန ညွှန်ကြားရေးမှူးချုပ်ရုံးတွင် ကျင်းပခဲ့သော အစည်းအဝေး၌ အထက်ပါကဲ့သို့ ပြောကြားခဲ့ခြင်းဖြစ်သည်။

မြန်မာနိုင်ငံသည် ယဥ်ကျေးမှုနှင့် သဘာဝအမွေအနှစ်များကြွယ်ဝသည့် နိုင်ငံတစ်နိုင်ငံဖြစ်ပြီး သဘာဝသယံဇာတများ ရေရှည်တည်တံ့စေရန် ထိန်းသိမ်းကာကွယ်ခြင်း၊ စီမံအုပ်ချုပ်ခြင်းနှင့် စနစ်တကျအသုံးပြုခြင်းတို့ကို ဆောင်ရွက်လျက်ရှိကြောင်း သိရသည်။

ထို့ပြင် ကမ္ဘာ့ဘူမိဥယျာဥ်အဖြစ် သတ်မှတ်ခံနိုင်ရေးအတွက် အလားအလာကောင်းများပိုင်ဆိုင်သည့် နေရာအများအပြားရှိနေပြီး ၎င်းတို့အနက်မှ ပုပ္ပါးတောင်ဒေသကို ကမ္ဘာ့ဘူမိဥယျာဥ်အဖြစ် သတ်မှတ်ခံနိုင်ရေးဆောင်ရွက်နေကြောင်း ပြည်ထောင်စုဝန်ကြီးက ပြောသည်။

လက်ရှိတွင် ပုပ္ပါးတောင်ဒေသကို ဘူမိဥယျာဥ်အဖြစ် သတ်မှတ်ခံရန် ဘူမိနယ်မြေ(၁၅)ခုဖြင့် ကနဦးအကောင်အထည်ဖော် ဆောင်ရွက်နေကြောင်း သိရသည်။

ထို့ပြင် အဆိုပါဒေသကို UNESCO စာရင်းတင်သွင်းနိုင်ရန်အတွက် သဘောသဘာဝမတူညီသည့် ဘူမိနယ်မြေအသစ်များကို ထပ်မံကွင်းဆင်းဖော်ထုတ်သွားရန် ပြည်ထောင်စုဝန်ကြီးက အသိပေးပြောကြားခဲ့သည်။

ပုပ္ပါးတောင်ဒေသ၌ ပုဂံခေတ် ရှေးဟောင်းသံချက်ဖိုများ၊ ထူးခြားရှားပါးသော ဇီဝမျိုးစုံမျိုးကွဲများနှင့် အစွယ်နှစ်ထပ်ဆင်၏ ကျောက်ဖြစ်ရုပ်ကြွင်းမေးရိုးများလည်း ရှိနေကြောင်း သိရသည်။

ထို့ကြောင့် အဆိုပါဒေသကို ကမ္ဘာ့အဆင့်ဘူမိဥယျာဥ်အဖြစ် အမည်စာရင်း အဆိုမပြုမီ အမျိုးသားအဆင့်ဘူမိဥယျာဥ်အဖြစ် ဦးစွာသတ်မှတ်ရမည်ဖြစ်ပြီး ဆက်စပ်ဝန်ကြီးဌာနများ၊ အဖွဲ့အစည်းများနှင့် ပေါင်းစပ်ဆောင်ရွက်လျက်ရှိကြောင်း ပြည်ထောင်စုဝန်ကြီးက ပြောသည်။

ကုလသမဂ္ဂပညာရေး၊ သိပ္ပံနှင့်ယဥ်ကျေးမှုအဖွဲ့ UNESCO သည် ကမ္ဘာ့ဘူမိဥယျာဥ်အစီအစဥ်ကို ၂၀၁၁ ခုနှစ်တွင်စတင်ခဲ့ရာ လက်ရှိတွင် နိုင်ငံပေါင်း (၄၈)နိုင်ငံ၌ ကမ္ဘာ့ဘူမိဥယျာဥ် (၁၉၅)ခု ရှိပြီဖြစ်ကြောင်း ပြည်ထောင်စုဝန်ကြီးက ပြောကြားထားသည်။

ထို့ပြင် ပြည်တွင်း၌ နိုင်ငံတကာနှင့် ဒေသအဆင့် အသိအမှတ်ပြု ထိန်းသိမ်းရေးနယ်မြေများအဖြစ် အာဆီယံအမွေအနှစ်ဥယျာဥ်(၈)ခု၊ လူသားနှင့် ဇီဝ အဝန်းနယ်မြေ(၂)ခု၊ ရမ်ဆာရေဝပ်ဒေသ(၆)ခုနှင့် အရှေ့အာရှသြစတြေးလျဒေသ ငှက်ပျံသန်းရာလမ်းကြောင်း ကွန်ရက်နယ် မြေ(၆)ခု သတ်မှတ်ခံရပြီးဖြစ်ကြောင်း သိရသည်။