ယွန်း (NSS) - ဇူလိုင် ၁၉

ဗိုလ်မြဒင် အပါအဝင် ရှေးခေတ်ရုပ်ရှင်ကားကြီး လေးကားအား ပိုင်ရှင်များအနေဖြင့် သက်သေအထောက် အထားတင်ပြ၍ ပိုင်ဆိုင်ကြောင်းဆက်သွယ်ခြင်းမရှိပါက ရုပ်ရှင်အစည်းအရုံး၏ ပိုင်ဆိုင်မှုအဖြစ် သတ် မှတ်သွားမည်ဖြစ်ကြောင်း သိရသည်။

မြန်မာနိုင်ငံရုပ်ရှင်အစည်းအရုံးက ယမန်နေ့(ဇူလိုင်လ ၁၈ ရက်)တွင် အထက်ပါကဲ့သို့ အသိပေးကြေညာထားခြင်းဖြစ်သည်။

ဗိုလ်မြဒင်(၁၉၅၇) အပါအဝင် သံမဏိသစ္စာ(၁၉၇၀)၊ မှုံနံသာခြယ်ကာသပါလို့(၁၉၇၂) နှင့် ငွေလှိုင်းဇာပေါ်မှာ(၁၉၈၇) စသည့် ရုပ်ရှင်ကားလေးကားသည် မှိုတက်နေသော Umatic Tape ခွေများအဖြစ် ကျန်ရှိနေကြောင်း မြန်မာနိုင်ငံရုပ်ရှင်အစည်းအရုံးမှ အသိပေးထားသည်။

အဆိုပါ ရုပ်ရှင်ဇာတ်ကားများကို မြန်မာနိုင်ငံရုပ်ရှင်အစည်းအရုံးက အများပြည်သူသို့ ပြန်လည်ပြသနိုင်ရန် မှိုသန့်စင်ခြင်း အပါအဝင် တိတ်ခွေမှ ဒီဂျစ်တယ်စနစ်ဖြင့် ပြသပေးနိုင်ရေး လုပ်ငန်းများကို အဆင့် ဆင့်ဆောင်ရွက်သွားမည်ဖြစ်ကြောင်း သိရသည်။

ထို့ပြင် ၎င်းတိပ်ခွေများကို ပြသမည့် Umatic Tape Player များသည် လက်ရှိတွင် အသစ်ထွက်ရှိခြင်းမရှိတော့သည့်အတွက် တစ်ပတ်ရစ်စက်များကို ပြည်ပမှရှာဖွေလုပ်ဆောင်ရမည်ဖြစ်ကြောင်း မြန်မာနိုင်ငံရုပ်ရှင်အစည်းအရုံးက ဆိုထားသည်။

“Tape နဲ့ လုပ်ထားတဲ့ဟာတွေပါ အချပ်ဖြစ်အောင်ပြန်ကူးရဦးမယ် ကြားထဲမှာ အဆင့်တွေရှိသေးတယ်။ အခုလောလောဆယ်တော့ သန့်ရှင်းရေးလုပ်ပြီး ကူးဖို့တွေလုပ်နေတယ်။ အဲဒီစက်ကလည်း မှာရမယ်။ အခုက မူရင်းပိုင်ရှင်သိအောင်ကြေညာလိုက်တာ။ နောက်မို့ဆိုရင် ပိုက်ဆံတွေ ကုန်ပြီးတော့ နောက်ပိုင်းကျ ပိုင်ရှင်ပေါ်လာတာတွေဘာတွေဖြစ်မှာစိုးလို့ပါ။ ကားတွေကလည်း ရှားရှားပါးပါးတွေလေ။ တချို့တွေက ရှိတောင်မရှိတော့ဘူး” ဟု မြန်မာနိုင်ငံရုပ်ရှင်အစည်းအရုံး ဒုဥက္ကဋ္ဌ ဦးအေးကြူလေးက NP News ကိုပြောသည်။

အဆိုပါ ဇာတ်ကားများအတွက် ဇာတ်ကားတစ်ထုပ်လျှင် ငွေကျပ် (၁၀)သိန်းအထက်ကုန်ကျမည်ဖြစ်ပြီး ပိုင်ရှင်များအနေဖြင့် မိမိဇာတ်ကားများကို ပြန်လည်ရယူလိုပါက မြန်မာနိုင်ငံရုပ်ရှင်အစည်းအရုံးသို့ ငွေကျပ်(၁၀)သိန်း ကြိုတင်သွင်းရမည်ဖြစ်ကြောင်း သိရသည်။

“တစ်ချို့ကလည်း ဆက်သွယ်တာမရှိပါဘူး။ တစ်ချို့ဆိုရင် ကုမ္ပဏီတောင်မရှိတော့ဘူး”ဟု ဦးအေးကြူလေးက ဆက်လက်ပြောသည်။

ပိုင်ရှင်များအနေဖြင့် ရုပ်ရှင်ကားများကို ပိုင်ဆိုင်ကြောင်း သက်သေအထောက်အထားတင်ပြ၍ အောက်တိုဘာလနောက်ဆုံးထားပြီး ငွေပေးသွင်းရမည်ဖြစ်ကြောင်း အစည်းအရုံးက အသိပေးကြေညာထားသည်။

၎င်းတို့အနေဖြင့် ဆက်သွယ်မှုမရှိပါက အဆိုပါရုပ်ရှင်ကားများကို မြန်မာနိုင်ငံရုပ်ရှင်အစည်းအရုံးပိုင်ဆိုင်မှုအဖြစ် သတ်မှတ်မည်ဖြစ်ကြောင်း ထုတ်ပြန်ချက်တွင် ဖော်ပြထားသည်။