ဂျန်ဇက် (NSS) - ဇူလိုင် ၁၈

ထိုင်းဖွဲ့စည်းပုံအခြေခံဥပဒေခုံရုံးအနေနဲ့ ဝန်ကြီးချုပ်အသစ်ရွေးချယ်ပွဲ  ထပ်မံကျင်းပမယ့် ဇူလိုင်လ ၁၉ ရက်မှာ ရှေ့သို့ချီပါတီခေါင်းဆောင် ပီတ လင်ဂျာရိုအမ်ရက်ကို လွှတ်တော်ကိုယ်စားလှယ်အဖြစ် အရည်အ ချင်းပျက်ယွင်းမှုရှိ/မရှိ ဆိုတဲ့အချက်ကို စဉ်းစားဆုံးဖြတ်သွားမယ်လို့ သိရပါတယ်။ 

ထိုင်းဝန်ကြီးချုပ်အသစ်ရွေးချယ်ပွဲကို လာမယ့် ဇူလိုင်လ ၁၉ ရက်မှာ လွှတ်တော်အတွင်းထပ်မံပြုလုပ်သွားမှာဖြစ်ရာ ပီတကို ဝန်ကြီးချုပ်အသစ် ထပ်မံအမည်စာရင်းတင်သွင်းဖွယ်ရှိနေကြောင်းသိရပါတယ်။ 

ပီတ လင်ဂျာရိုအမ်ရက်ဟာ ရွေးကောက်ပွဲကာလအတွင်း စည်းကမ်းများကိုချိုးဖောက်ခဲ့တယ်လို့ စွပ်စွဲခံရပြီးနောက် ရွေးကောက်ပွဲကော်မရှင်က ပြီးခဲ့တဲ့သီတင်းပတ်မှာ စစ်ဆေးဆုံးဖြတ်ခဲ့ရာ ပီတ လင်ဂျာရိုအမ်ရက်ကို လွှတ်တော်ကိုယ်စားလှယ်အဖြစ် အရည်အချင်းပျက်ယွင်းသူအဖြစ်သတ်မှတ်ခဲ့ပြီး အဲဒီအမှုကို အပြီးသတ်စစ်ဆေးနိုင်အောင် ဖွဲ့စည်းပုံအခြေခံဥပဒေခုံရုံးကို ထပ်မံလွှဲပြောင်းပေးခဲ့ကြောင်းသိရပါတယ်။ထိုင်းရွေးကောက်ပွဲစည်းကမ်းတွေထဲမှာ ရွေးကောက်ပွဲပါဝင်ယှဉ်ပြိုင်မယ့် ကိုယ်စားလှယ်လောင်းဟာ မီဒီယာလုပ်ငန်းတွေပိုင်ဆိုင်ခြင်း သို့မဟုတ် ရှယ်ယာပိုင်ဆိုင်ခြင်းမျိုးမရှိရဘူးလို့ စည်းကမ်းသတ်မှတ်ထားရာ ပီတလင်ဂျာရိုအမ်ရက်ဟာ iTV Plc, ရုပ်သံ မီဒီယာလုပ်ငန်းမှာ ရှယ်ယာ အရေအတွက် ၄၂၀၀၀ ကျော်ပိုင် ဆိုင်ထားတယ်လို့ စွပ်စွဲခံထားရပါတယ်။ ဇူလိုင်လ ၁၉ ရက်မှာ ထိုင်းလွှတ်တော်အတွင်း ဝန်ကြီးချုပ်အသစ်ရွေးချယ်ပွဲ ဒုတိယအကျော့ထပ်မံရွေးချယ်မှာဖြစ်ရာ ပီတအတွက် အရေးကြီးတဲ့နေ့တစ်နေ့ဖြစ်နေပါတယ်။ 

ဖွဲ့စည်းပုံအခြေခံဥပပေဒခုံရုံးဟာ ပီတရဲ့အမှုကို နံနက်ပိုင်းမှာအပြီးသတ်ဆုံးဖြတ်မလား ဆိုတဲ့အချက်ကတော့ အတိအကျမသိသေးကြောင်းသိရပါတယ်။ ဇူလိုင်လ ၁၉ ရက်၊ နံနက်ပိုင်းမှာတော့ လွှတ်တော်အတွင်း ပီတကို ဝန်ကြီးချုပ်အသစ်အဖြစ် ထပ်မံတင်သွင်းမှုကို ခွင့်ပြုပေးဖို့ သင့်၊ မသင့်ဆိုတဲ့အချက်ကို လွှတ်တော်အတွင်း အကြိတ်အနယ်ဆွေးနွေးဖွယ်ရှိနေကြောင်း ထိုင်းသတင်းတွေကဖော်ပြထားပါတယ်။ ရွေးကောက်ပွဲကော်မရှင်ဟောင်းတစ်ဦးဖြစ်တဲ့ ဆွန်ချိုင်းက ရှေ့သို့ချီပါတီခေါင်းဆောင်ဟာ လွှတ်တော်ကိုယ်စားလှယ်အဖြစ်အရည်အချင်းပျက်ယွင်းကြောင်းသတ်မှတ်ခံရမယ်ဆိုရင်တောင် ရှေ့သို့ချီပါတီရဲ့တစ်ဦးတည်းသောကိုယ်စားလှယ်လောင်းအဖြစ် ဆက်ရှိနေမယ်လို့ မျှော်လင့်ကြောင်း ပြောပါတယ်။