ဂျန်ဇက် (NSS) - ဇူလိုင် ၁၅

ထိုင်းနိုင်ငံခြားရေးဝန်ကြီးဟာ အင်ဒိုနီးရှားနိုင်ငံမှာကျင်းပခဲ့တဲ့ အာဆီယံနိုင်ငံခြားရေးဝန်ကြီးများအစည်း အဝေးအတွင်း တရုတ်နိုင်ငံရဲ့ထိပ်တန်းသံတမန် ဝမ်ယိနဲ့တွေ့ဆုံပြီး မြန်မာနိုင်ငံရေးအခက်အခဲများကို ဆွေးနွေးခဲ့တယ်လို့ သိရပါတယ်။

ထိုင်းနိုင်ငံခြားရေးဝန်ကြီးဟာ ဒေါ်အောင်ဆန်းစုကြည်နဲ့တွေ့ဆုံဆွေးနွေးပြီးနောက်ရက်ပိုင်းအကြာမှာ မြန်မာ့အရေးအတွက် တရုတ်အထူးသံတမန်နဲ့တွေ့ဆုံဆွေးနွေးခဲ့တာဖြစ်ပါတယ်။ ထိုင်းနိုင်ငံခြားရေးဝန်ကြီးဒွန်ပရာမွတ် ဝီနိုင်းက မြန်မာနိုင်ငံရေး အခက်အခဲကို နိုင်ငံနည်းလမ်းနဲ့အဖြေရှာနိုင်ဖို့ အရှိန်မြင့်ကြိုးပမ်းရာမှာ တရုတ်နိုင်ငံကို အဓိက အခန်းကဏ္ဍက ဆက်လက်ပါဝင်ပေးဖို့ မျှော်လင့်ထားတယ်လို့ ပြောပါတယ်။ 

တရုတ် အထူးသံတမန် နဲ့ ထိုင်းနိုင်ငံခြားရေးဝန်ကြီးတို့ဟာ မြန်မာ့နိုင်ငံရေးကိစ္စအပြင် အပြန်အလှန်ပူးပေါင်းဆောင်ရွက်ရေးကိစ္စများကို ဆွေးနွေးခဲ့တယ်လို့ ဆိုပါတယ်။ ပြင်ပ ကြားဝင်စွက်ဖက်မှုများမြင့်တက်နေချိန်မှာ မြန်မာနိုင်ငံရေးအခက်အခဲကို ကိုယ်ပိုင်နည်းလမ်းနဲ့ ဖြေရှင်းနိုင်ဖို့ ကြိုးပမ်းနေတဲ့  အာဆီယံအဖွဲ့ရဲ့ ကြိုးပမ်းမှုများကို အားပေးထောက်ခံသလို အာဆီယံဟာ မြန်မာနိုင်ငံရေးအခက်အခဲတွေကို ဖြေရှင်းနိုင်ဖို့ အဖွဲ့စည်းအားလုံးလက်ခံနိုင်သော လမ်းပြမြေပုံကိုလည်း လုပ်ဆောင်နိုင်ခဲ့ကြောင်း၊မြန်မာ နိုင်ငံရေးအခက်အခဲကို ဖြေရှင်းနိုင်ဖို့ ထိုင်းနိုင်ငံရဲ့ချဉ်းကပ်မှုများအပေါ် ချီးကျူးကြောင်း တရုတ်နိုင်ငံက အာဆီယံ၏ စုစည်းညီညွတ်မှုနှင့် ပူးပေါင်းဆောင်ရွက်များကိုထိန်းသိမ်းနိုင်ဖို့ ထောက်ခံသွားမှာဖြစ် ကြောင်း တရုတ်ထိပ်တန်းသံတမန် ဝမ်ယိကပြောပါတယ်။ 

ထိုင်းနိုင်ငံခြားရေးဝန်ကြီးဟာ မြန်မာနိုင်ငံရေးအခက်အခဲကိုဖြေရှင်းနိုင်အောင် ရည်ရွယ်ချက်နဲ့  နစကရဲ့နိုင်ငံခြားရေးဝန်ကြီးတွေ ပါဝင်တက်ရောက်ခွင့်ရတဲ့ မြန်မာ့အရေးအလွတ်သဘောတွေ့ဆုံဆွေးနွေးပွဲကို အိမ်ရှင်အဖြစ် သုံးကြိမ်တိုင်လက်ခံကျင်းပခဲ့ပါတယ်။ ထိုင်းနိုင်ငံခြားရေးဝန်ကြီးဟာ အာဆီယံနိုင်ငံခြား ရေးဝန်ကြီးများအစည်းအဝေးမတိုင်ခင် ဇူလိုင်လ ၉ ရက်က မြန်မာနိုင်ငံကိုလာရောက်ခဲ့ပြီး ဒေါ်အောင်ဆန်းစုကြည်နဲ့တွေ့ဆုံဆွေးနွေးခဲ့တာဖြစ်ပါတယ်။ ထိုင်းနိုင်ငံခြားရေးဝန်ကြီးရဲ့မြန်မာ့အရေးဆောင်ရွက်ချက်များနဲ့ပတ်သက်ပြီး အာဆီယံအဖွဲ့ဝင်နိုင်ငံများကြား သဘောထားကွဲလွဲမှုများရှိလာခဲ့ကြောင်းသတင်းများလည်းထွက်ပေါ်နေခဲ့ပါတယ်။