သန့်ဇင် (NSS) - ဇူလိုင် ၁၅

ရန်ကုန်-မန္တလေးအမြန်လမ်းမကြီးတွင် အိမ်စီးကားတစ်စီး အရှိန်လွန်ကာ ထန်းပင်အား ဝင်တိုက်မှုဖြစ်ပွားခဲ့ရာ လူ(၂)ဦးထိခိုက်ဒဏ်ရာရရှိခဲ့ကြောင်း မြန်မာနိုင်ငံမီးသတ်ဦးစီးဌာနက အသိပေးထားသည်။

ဖြစ်စဉ်မှာ ယနေ့(ဇူလိုင် ၁၅ရက်) ညနေ ၃နာရီခွဲအချိန်တွင် ဖြူးမြို့နယ်၊ ရန်ကုန်-မန္တလေး အမြန်လမ်းမကြီး မိုင်တိုင်အမှတ် (၁၁၈/ဝ)နှင့် (၁၁၈/၁)ကြားတွင် အထက်ပါကဲ့သို့ဖြစ်ပွားခဲ့ကြောင်း သိရသည်။

အဆိုပါမိုင်တိုင်အရောက်တွင် AD Vanအမျိုးအစား ကားတစ်စီးသည် အရှိန်မထိန်းနိုင်ဖြစ်ကာ လမ်းလယ်ကျွန်းရှိ ထန်းပင်အား ဝင်တိုက်မိခဲ့ခြင်း ဖြစ်ကြောင်းသိရသည်။

ထိုသို့ ထန်းပင်အား ဝင်တိုက်မိခဲ့ခြင်းကြောင့် ကားပေါ်ရှိ အမျိုးသားတစ်ဦးနှင့် အမျိုးသမီးတစ်ဦး ထိခိုက်ဒဏ်ရာများရရှိခဲ့ပြီး အမျိုးသမီးဖြစ်သူမှာ စိုးရိမ်ဖွယ်အခြေနေရှိကြောင်း မီးသတ်တပ်ဖွဲ့က ဆိုထားသည်။

လက်ရှိတွင် ထိခိုက်ဒဏ်ရာရရှိခဲ့သော အမျိုးသားနှင့် အမျိုးသမီးတို့ကို အမြန်လမ်းကြက်ခြေနီအသင်းမှ လူနာတင်ယာဉ်ဖြင့် ဖြူးမြို့နယ်ပြည်သူ့ဆေးရုံသို့ ပို့ဆောင်ပေးခဲ့ကြောင်း သိရသည်။