Pika (NSS) - ဇူလိုင် ၁၅

ရုရှားသမ္မတပူတင်သည် တောင်အာဖရိကနိုင်ငံတွင် လာမည့်လ၌ကျင်းပမည့် BRICS ထိပ်သီးအစည်း အဝေးကို တက်ရောက်လိုကြောင်း တောင်အာဖရိကဒုသမ္မတ Paul Mashatile ကပြောကြားခဲ့သည်။

သို့သော်လည်း  ပူတင်အပေါ် ထုတ်ထားသည့် ဖမ်းဝရမ်းကြောင့် သံတမန်ရေးအရ ထိခိုက်နစ်နာမှုများကို ရှောင်ရှားနိုင်ရန်အတွက် အဆိုပါအစည်းအဝေးသို့ မတက်ရောက်ရန်  ရုရှားသမ္မတပူတင်ကို တောင်အာဖရိကအစိုးရက တိုက်တွန်းပြောဆိုနေကြောင်း ၎င်းကပြောကြားခဲ့သည်။ နိုင်ငံတကာ ရာဇဝတ်တရားရုံးက ရုရှားသမ္မတပူတင်သည် ယူကရိန်းမှကလေးငယ်များကို ပြန်ပေးဆွဲခဲ့သည်ဆိုသည့်စွပ်စွဲချက်များဖြင့် ပြီးခဲ့သည့်မတ်လတွင် ဖမ်းဝရမ်းထုတ်ခဲ့ခြင်းဖြစ်ကြောင်းသိရသည်။ သို့သော်လည်း နိုင်ငံတကာရာဇဝတ်တရားရုံး၏ ဖမ်းဝရမ်းကို ရုရှားဘက်က လက်မခံခဲ့ကြောင်းသိရသည်။

ယူကရိန်းကို ကျူးကျော်တိုက်ခိုက်မှုများနှင့်ပတ်သက်ပြီး ရုရှားကို ပြစ်တင်ရှုတ်ချမှုများ လုပ်ဆောင်ရန် ငြင်းဆိုခဲ့သော တောင်အာဖရိကအစိုးရသည် ဘရာဇီး၊ ရုရှား၊ အိန္ဒိယ၊ တရုတ်တို့ပါဝင်သော BRICS ထိပ် သီးအစည်းအဝေးကို ရုရှားသမ္မတပူတင်ကို တက်ရောက်ခွင့်ပြုမည်ဆိုပါက အနောက်အုပ်စုနိုင်ငံများနှင့် ဆက်ဆံရေးပိုမိုတင်းလာနိုင်မည့် အခြေအနေများကို ရင်ဆိုင်ရဖွယ်ရှိနေကြောင်းသိရသည်။ နိုင်ငံတကာ ရာဇဝတ်တရားရုံးက ဖမ်းဝရမ်းထုတ်ခဲ့ပြီးကတည်းက ရုရှားသမ္မတပူတင်သည် တောင်အာဖရိကနိုင်ငံသို့ သွားရောက်ခဲ့ခြင်းမျိုး မရှိဖူးသေးကြောင်းသိရသည်။ ရုရှားအစိုးရတာဝန်ရှိသူများက ပူတင်သည်  BRICS ထိပ်သီးအစည်းအဝေးကို တက်ရောက်ခြင်းရှိ/မရှိဆိုသည့် အချက်ကို ထုတ်ဖော်ပြောကြားခြင်းမျိုးမရှိသေးကြောင်းသိရသည်။ 

ထို့ပြင် မကြာသေးမီက ရုရှားနိုင်ငံတွင်ဖြစ်ပွားခဲ့သော ရုရှားကြေးစားအုပ်စု Wagner အဖွဲ့၏ ပုန်ကန်မှုများကြောင့် ပူတင်၏အာဏာကို စိန်ခေါ်မှုများ ဖြစ်စေခဲ့မှုနှင့်အတူ ၎င်းအနေဖြင့် ခရီးသွားဖို့ မဖြစ်နိုင်ကြောင်း ရုရှားအစိုးရတာဝန်ရှိသူများက ပြောကြားခဲ့သည်။ 

တောင်အာဖရိကဒုသမ္မတ Paul Mashatile က "ဒါကကျွန်တော်တို့အတွက် ကြီးမားတဲ့ အကျပ်အတည်းတစ်ခုပါပဲ။ ကျွန်တော်တို့ ပူတင်ကို ဖမ်းဆီးလို့မရပါဘူး။ ဒါက သူငယ်ချင်းကို အိမ်ကို ဖိတ်ခေါ်ပြီး ဖမ်းတာနဲ့တူနေပါတယ်။ ဒါကြောင့် ဒီအစည်းအဝေးကို ပူတင်မတက်ရောက်တာက အကောင်းဆုံးဖြေ ရှင်းချက်ပါပဲ။ ဒါပေမယ့် ရုရှားလူမျိုးတွေက ပူတင်ကို ဒီအစည်းအဝေးကို တက်ရောက်စေချင်ကြပါတယ်"ဟုပြောဆိုခဲ့သည်။