ယွန်း (NSS) - ဇူလိုင် ၁၄

ဇူလိုင်(၁၉)ရက်တွင် ကျရောက်မည့် (၇၆)နှစ်မြောက် အာဇာနည်ဗိမာန်သို့ လာရောက်သူများအနေဖြင့် ဖုန်း အပါအဝင် ပန်းစည်း၊ ပန်းခြင်းတို့ကို ယူဆောင်လာခြင်းမပြုရန် နစကမှ အသိပေးထုတ်ပြန်ထားသည်။

အဆိုပါ အာဇာနည်နေ့တွင် ဘောလ်ပင်အမျိုးမျိုး အပါအဝင် လက်ကိုင်ဖုန်းအမျိုးမျိုး၊ အလံအမျိုးမျိုး၊ လက်ကိုင် အိတ်အမျိုးမျိုး၊ ကင်မရာအမျိုးမျိုး၊ မီးခြစ်အမျိုးမျိုး၊ ပန်းခွေ/ပန်းစည်း/ပန်းခြင်းအမျိုးမျိုး၊ ဗီနိုင်းစအမျိုးမျိုး၊ ပုလင်း/ဘူးအမျိုးမျိုး၊ အလံကိုင်‌ဆောင်ရာတွင် သုံးသည့် ကော်ပိုက်/တုတ်နှင့် သံပိုက်များကို ယူ‌ဆောင်၍ အာဇာနည်ဗိမာန်အတွင်းသို့ ဝင်ရောက်ခွင့်မပြုကြောင်း ထုတ်ပြန်ထားသည်။

အလားတူ လာရောက်သူများသည် နှာခေါင်စည်း(MASK)များ မပျက်မကွက် တပ်ဆင်ရန်နှင့် သတ်မှတ်ထားသည့် နေရာများတွင် စနစ်တကျ လက်ဆေးခြင်း၊ အသင့်ထားရှိသော Hand Sanitizer သုတ်လိမ်းခြင်းတို့ကို ဆောင်ရွက် ပြီးမှ ဝင်ရောက်ခွင့်ပြုမည်ဖြစ်ကြောင်း သိရသည်။

ဗဟန်းမြို့နယ်၊ လင့်ခ်လမ်းတွင် ကိုယ်အပူချိန်တိုင်းတာခြင်းအပါအဝင် ကျန်းမာရေးဆိုင်ရာစိစစ်မှုများနှင့် နိုင်ငံသား စိစစ်ရေးကတ် (သို့မဟုတ်) ကိုယ်ရေးအချက်အလက် စိစစ်နိုင်သည့် အသိအမှတ်ပြုကတ်ပြားယူဆောင်လာရန် နစက မှ ထည့်သွင်း အသိပေးထားသည်။

အာဇာနည်နေ့တွင် လာရောက်ဂါရဝပြုသူများသည် တာဝန်ထမ်းဆောင်သူများ၏ စီစဉ်ဆောင်ရွက်မှုနှင့်အညီ လိုက်နာဆောင်ရွက်ရန် နှင့် ဂါရဝပြုရာတွင် တစ်ဦးလျှင် (၆)ပေခြား၍ (၁)ကြိမ်လျှင် (၁ဝ)ဦးစီဖြင့် သတ်မှတ်နေရာ တွင် ဂါရဝပြုရန် နစကမှ ထည့်သွင်း ထုတ်ပြန်ထားသည်။

အလားတူ သက်ကြီးရွယ်အိုများ၊ နာတာရှည်ရောဂါရှိသူများအား အာဇာနည်ဗိမာန်သို့ လုံးဝလာရောက်ခြင်းမပြုရန် အသိပေးထုတ်ပြန်ထားသည်။

ထို့အတူ အတွင်းဝန်ရုံး(ယခင် ဝန်ကြီများရုံး) နှင့် ဗိုလ်ချုပ်အောင်ဆန်းပြတိုက်သို့ သွား ရောက်လည်ပတ်မည့်သူများအနေဖြင့် အထက်ပါကဲ့သို့ ပစ္စည်းများယူဆောင်လာခြင်းကို ခွင့်မပြုကြောင်းလည်း နစကမှ ဆိုထားသည်။

အလားတူ အာဇာနည်ဗိမာန် အပါအဝင် ဗိုလ်ချုပ်အောင်ဆန်းပြတိုက်နှင့် အတွင်းဝန်ရုံး(ယခင်ဝန်ကြီးများရုံး) သို့ လာရောက်မည့် ပြည်သူများအနေဖြင့် Drone ယာဥ်များ ယူဆောင်လာခြင်း၊ လွှတ်တင်ခြင်းမပြုရန် နစကမှ ထုတ်ပြန်ထားသည်။