ဂျန်ဇက် (NSS) - ဇူလိုင် ၁၄

ဇူလိုင် ၁၃ ရက်က ကျင်းပခဲ့တဲ့ ထိုင်းဝန်ကြီးချုပ်အသစ်ရွေးချယ်ပွဲမှာ လုံလောက်တဲ့ မဲအရေအတွက် မရခဲ့ပေမယ့် ဝန်ကြီးချုပ်ဖြစ်ရေးမျှော်လင့်ချက်ကို စွန့်လွှတ်မှာမဟုတ်ကြောင်း ရှေ့သို့ချီပါတီခေါင်းဆောင် ပီတက ထုတ်ဖော် ပြောဆိုလိုက်ပါတယ်။

ရှေ့သို့ချီပါတီခေါင်းဆောင် ပီတလင်ဂျာရိုအမ်ရက်ဟာ လွှတ်တော်အတွင်းပထမအကြိမ် ဝန်ကြီးချုပ်ရွေးချယ်ပွဲမှာ ထောက်ခံမဲ ၃၂၄ မဲသာ ရရှိခဲ့ပြီး ကန့်ကွက်မဲ ၁၈၂ မဲ၊ ကြားနေမဲ ၁၉၉ မဲရရှိခဲ့ကြောင်း သိရပါတယ်။ ထိုင်းဖွဲ့စည်းပုံအခြေခံဥပဒေထဲမှာ ဝန်ကြီးချုပ်ဖြစ်ဖို့ ကိုယ်စားလှယ်ဦးရေ ၇၅ဝ ရှိ လွှတ်တော်နှစ်ရပ်ပေါင်းရဲ့ ထောက်ခံမဲ အနည်းဆုံး ၃၇၅ မဲ ရရှိရမယ်လို့ သတ်မှတ်ထားရာ ပီတဟာ အဆိုပါအရေအတွက်မျိုးကို မရခဲ့ကြောင်း သိရပါတယ်။

ပီတက "ကျွန်တော်ဟာ မဲရလဒ်တွေကို လက်ခံပါတယ်။ ဒါပေမယ့် ဝန်ကြီးချုပ်ဖြစ်ရေး မျှော်လင့်ချက်ကိုတော့ စွန့်လွှတ်မှာ မဟုတ်ဘူး" လို့ ပြောပါတယ်။

ရှေ့သို့ချီပါတီခေါင်းဆောင်က အထက်လွှတ်တော်အမတ်တွေဟာ ဖိအားတွေနဲ့ ရင်ဆိုင်နေရကြောင်း၊ အချို့အမတ် တွေဟာ လွှတ်တော်နှစ်ရပ်ပေါင်းပြုလုပ်တဲ့အစည်းအဝေးကို  တက်ရောက်ခြင်းမရှိဘဲ ရှောင်ရှားနေကြောင်း ပြောပါ တယ်။ ၎င်းက "ကျွန်တော်အနေနဲ့ သတ်မှတ်ထားတဲ့ မဲအရေအတွက်မျိုးရရှိအောင် ထောက်ခံမဲရဖို့ မဟာဗျူဟာ မြောက်ကြိုးပမ်းရမယ်" လို့ ပြောပါတယ်။

အထက်လွှတ်တော်အမတ်တွေဟာ ရွေးကောက်ပွဲမဲဆွယ်စည်းရုံးချိန်ကာလအတွင်း ထိုင်းဘုရင့်စနစ်ကို ဝေဖန်လို့ မရအောင် အကာအကွယ်ပေးထားတဲ့ဥပဒေကို ပြင်ဆင်ဖို့ ကြိုးပမ်းမယ်လို့ ပြောဆိုချက်များနဲ့ပတ်သက်ပြီး ပီတ နဲ့ ရှေ့သို့ချီပါတီကို လိုလားခြင်းမရှိကြောင်း သိရပါတယ်။ ထိုင်းဝန်ကြီးချုပ်အသစ်ရွေးချယ်ပွဲကို ဒုတိယအကျော့ကို လာမယ့် ဇူလိုင် ၁၉ ရက် နဲ့ တတိယအကျော့ကို ဇူလိုင် ၂ဝ ရက်တို့မှာ ကျင်းပမှာဖြစ်ကြောင်း သိရပါတယ်။