ယွန်း (NSS) - ဇူလိုင် ၁၃

ချင်းတွင်းမြစ်ရေသည် နောက်(၂)ရက်အတွင်း ခန္တီးမြို့နှင့် ဟုမ္မလင်းမြို့တို့၏ စိုးရိမ်ရေမှတ်သို့ရောက်ရှိနိုင်ကြောင်း မိုးဇလမှ သတိပေးထုတ်ပြန်ထားသည်။မိုးလေဝသနှင့် ဇလဗေဒညွှန်ကြားမှုဦးစီးဌာနမှ ယနေ့(ဇူလိုင်လ ၁၃ ရက်)၊ နေ့လယ်ပိုင်းတွင် အထက်ပါကဲ့သို့ ထုတ်ပြန်ထားခြင်းဖြစ်သည်။

မိုးဇလမှ ယနေ့ နံနက်(၉)နာရီခွဲအချိန်တိုင်းထွာချက်အရ ချင်းတွင်းမြစ်ရေသည် စစ်ကိုင်းတိုင်း၊ ခန္တီးမြို့တွင် ယင်းမြို့၏ စိုးရိမ်ရေမှတ်အောက်(၄)ပေခန့်တွင် ရောက်ရှိနေကြောင်း သိရသည်။

အဆိုပါ မြစ်ရေသည် နောက်(၂)ရက်အတွင်း ခန္တီမြို့၏ စိုးရိမ်ရေမှတ်သို့ ရောက်ရှိနိုင်ကြောင်း မိုးဇလမှ ထုတ်ပြန်ထားသည်။

ထို့ပြင် ဟုမ္မလင်းမြို့တွင်လည်း ချင်းတွင်းမြစ်ရေသည် ယင်းမြို့၏ စိုးရိမ်ရေမှတ်အောက်(၃)ပေခန့်တွင် ‌ရောက်ရှိနေပြီး နောက်(၂)ရက်အတွင်း အဆိုပါမြို့၏ စိုးရိမ်‌ရေမှတ်သို့ ရောက်နိုင်ကြောင်း ဆက်လက်ထုတ်ပြန်ထားသည်။

ထို့ကြောင့် မြစ်ကမ်းအနီးနှင့် မြေနိမ့်ပိုင်းဒေသတွင် နေထိုင်သူများအနေဖြင့် ရေဝင်ရောက်မှုများ ဖြစ်ပေါ်လာနိုင်ခြင်းကြောင့် သတိပြုနေထိုင်သင့်ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနမှ သတိပေးထုတ်ပြန်ထားသည်။