Pika (NSS) - ဇူလိုင် ၁၂

တိုက်စစ်မှူးမက်ဆီသည် ၎င်း၏ ကစားသမားဘဝသက်တမ်း နောက်ဆုံးနှစ်များကို ရောက်ရှိနေခဲ့ပြီးနောက် အာဂျင်တီးနားအသင်းအတွက် ကစားခြင်းမှ အနားယူမည့်အချိန်မှာ မကြာမီအချိန်တွင်း ရောက်ရှိလာနိုင်ဖွယ်ရှိကြောင်း ဝန်ခံပြောဆိုခဲ့သည်။

အာဂျင်တီးနားအသင်းနှင့်အတူ (၂ဝ၂၂)ခုနှစ် ကမ္ဘာ့ဖလားကို ဆွတ်ခူးနိုင်ခဲ့ပြီးနောက်  မက်ဆီသည်ချန်ပီယံတစ်ဦးအဖြစ် ဆက်လက်ကစားသွားမည်ဖြစ်ကြောင်း ယခင်က ကတိပြုပြောဆိုခဲ့သည်။

သို့သော်လည်း (၂ဝ၂၆)ခုနှစ် ကမ္ဘာ့ဖလားပြိုင်ပွဲတွင် ဝင်ရောက်ယှဉ်ပြိုင်ကစားတော့မည် မဟုတ်ကြောင်း မက်ဆီ က ထုတ်ဖော်ပြောခဲ့သည်။ တိုက်စစ်မှူးမက်ဆီက ၎င်း၏ ကစားသမားဘဝသက်တမ်းမှာ နောက်ဆုံးအဆင့်သို့ ‌ရောက်ရှိနေပြီဖြစ်ပြီး နိုင်ငံတကာပွဲများအတွက် ကစားပေးခြင်းမှ အနားယူမည့်အချိန်မှာ မကြာမီအချိန်အတွင်း ရောက်ရှိလာတော့မည်ဖြစ်ကြောင်း ပြောဆိုခဲ့သည်။

မက်ဆီက "ရိုးရိုးသားသားပြောရရင် ဘယ်အချိန်မှာ အနားယူဖြစ်မလဲဆိုတာ ကျွန်တော်ကိုယ်တိုင်လည်း မသိပါဘူး။ ဖြစ်ချိန်တန်တဲ့အချိန်ကျရင် ဖြစ်လာမယ်လို့ ထင်ပါတယ်။ မကြာသေးမီအချိန်အတွင်း ကမ္ဘာ့ဖလားကို လည်း ဆွတ်ခူးနိုင်ပြီးပြီဖြစ်တဲ့အတွက် လုပ်ဖို့ကျန်ရှိနေတဲ့အရာကတော့ ပျော်ပျော်ရွှင်ရွှင်နေရဖို့ပါပဲ။ အနားယူမယ့် အခိုက်အတန့်က ဘယ်အချိန်မှာဖြစ်လာမယ်ဆိုတာကို ဘုရားသခင်က ဆုံးဖြတ်ပေးပါလိမ့်မယ်။ လက်တွေ့ကျကျ ပြောရမယ်ဆိုရင် ကျွန်တော့်အသက်အရွယ်ကြောင့်  မကြာမီအချိန်အတွင်း နားရမယ်ဆိုတာ သိပါတယ်။ ဒါပေမယ့် ဘယ်အချိန်ဖြစ်မလဲဆိုတာတော့ မသိပါဘူး။ နေ့တိုင်း ပျော်ပျော်ရွှင်ရွှင်ပဲဖြတ်သန်းရင်း စောင့်နေပါတယ်။ ကျွန်တော့်နိုင်ငံအသင်းအတွက် အရမ်းခက်ခဲတဲ့အချိန်တွေကို ဖြတ်သန်းခဲ့ရပြီးပါပြီ။ အခုအချိန်က ပျော်ရမယ့်အချိန် ပါပဲ" ဟု ပြောဆိုခဲ့သည်။