စော (NSS) - ဇူလိုင် ၁၂

ဧရာဝတီတိုင်း၊ ညောင်တုန်းမြို့နယ်ရှိ ဗိုလ်မြတ်ထွန်းတံတားအဆင်း၌ ကားတစ်စီး  ချောက်ထဲသို့ ပြုတ်ကျခဲ့ရာ လူ(၃)ဦး ထိခိုက်ဒဏ်ရာရရှိခဲ့ကြောင်း သိရသည်။

ဖြစ်စဉ်မှာ ယမန်နေ့(ဇူလိုင်လ ၁၁ ရက်)၊ နံနက် ၁၀နာရီဝန်းကျင်အချိန်တွင် ညောင်တုန်းမြို့၊ ဗိုလ်မြတ်ထွန်းတံတားအဆင်း၌ အထက်ပါကဲ့သိုဖြစ်ပွားခဲ့ခြင်းဖြစ်ကြောင်း နယ်လှည့်ကုသိုလ်ပြု နှလုံးလှဆရာဝန်များအဖွဲ့ထံမှ သိရသည်။

အဆိုပါယာဉ်သည် ဆေးကုမ္ပဏီတစ်ခုမှ probox အမျိုးအစား အဖြူရောင်ယာဉ်တစ်စီးဖြစ်ပြီး ၎င်းယာဉ်ပေါ်တွင် လူ(၃)ဦး လိုက်ပါလာကြောင်း သိရသည်။

“အဲဒီကားက ရန်ကုန်ဘက်ကဆင်းလာတာပါ။ တံတားအဆင်း အဖြူ အနီအုတ်တိုင်ကို အရှိန်ပြင်းပြင်း ဝင်တိုက်ပြီး ဝါးတစ်ပြန်လောက်ရှိတဲ့ ချောက်ထဲကို ဆင်းချသွားတာ။ တံတားအဆင်းကလာတယ်ဆိုရင် ညာဘက်ကနေလာရမှာပေါ့နော်။ သူက ညာဘက်ကိုမချိုးချပဲ ဘယ်ဘက်ကိုချိုးချသွားတာ။ ကျွန်တော်ထင်တာတော့ ယာဉ်မောင်းကပင်ပန်းပြီး အိပ်ငိုက်သွားတာဖြစ်မယ်”ဟု နယ်လှည့်ကုသိုလ်ပြု နှလုံးလှဆရာဝန်များအဖွဲ့မှ တာဝန်ရှိသူတစ်ဦးက NP News ကိုပြောသည်။

ယာဉ်တိမ်းမှောက်မှုကြောင့် လူ(၃)ဦး အနက် အမျိုးသမီးတစ်ဦးမှာ ဦးခေါင်းတွင် ထိခိုက်ဒဏ်ရာရရှိခဲ့ပြီး ကျန်အမျိုးသမီးတစ်ဦးသည် လည်ပင်းနှင့် ရင်ဘတ်တွင် ထိခိုက်ဒဏ်ရာရရှိခဲ့ကြောင်း သိရသည်။

ထို့ပြင် ယာဉ်မောင်းဖြစ်သူ အမျိုးသားသည် လေအိတ်ပွင့်သွားခြင်းကြောင့် အသက်အန္တရာယ်မစိုးရိမ်ရဘဲ လက်တွင် ထိခိုက်ဒဏ်ရာရရှိခဲ့ကြောင်း ၎င်းကဆက်လက်ပြောသည်။

အဆိုပါ ထိခိုက်ဒဏ်ရာရရှိသူများကို ညောင်တုန်း ဆေးရုံသို့ ပို့ဆောင်ပေးခဲ့ကြောင်း သိရသည်။