ဂျန်ဇက် (NSS) - ဇူလိုင် ၁၂

ထိုင်းနိုင်ငံခြားရေးဝန်ကြီး ဒွန်ပရာဝီနိုင်းက ဒေါ်အောင်ဆန်းစုကြည်ဟာ  စိတ်ပိုင်းဆိုင်ရာနဲ့ ရုပ်ပိုင်းဆိုင်ရာ ကျန်းမာနေတယ်လို့ အတည်ပြုပြောဆိုခဲ့ကြောင်း အာဆီယံသံတမန်သတင်းအရင်းမြစ်တွေက ပြောပါတယ်။ 

ထိုင်းနိုင်ငံခြားရေးဝန်ကြီးဟာ ဒေါ်အောင်ဆန်းစုကြည် ကျန်းမာရေးကောင်းမွန်နေတဲ့ အခြေအနေတွေကို အာဆီယံ နိုင်ငံခြားရေးဝန်ကြီးတွေကို အတည်ပြုပြောဆိုခဲ့ခြင်းဖြစ်ကြောင်း သိရပါတယ်။ ဝန်ကြီးဒွန်ပရာဝီနိုင်း က အင်ဒိုနီးရှားနိုင်ငံမှာ ကျင်းပတဲ့ အာဆီယံနိုင်ငံခြားရေးဝန်ကြီးများ အစည်းအဝေးကို မတက်ရောက်ခင် ဒေါ်အောင်ဆန်းစုကြည်နဲ့ သွားရောက်တွေ့ဆုံဆွေးနွေးခဲ့ကြောင်း ပြောပါတယ်။ 

ဒေါ်အောင်ဆန်းစုကြည် ဖမ်းဆီးထိန်းသိမ်းခံရပြီးနောက် တွေ့ဆုံခွင့်ရတဲ့ ပြည်ပနိုင်ငံတွေရဲ့သံတမန်တွေထဲမှာ ဒွန်ပရာဝီနိုင်းက ပထမဆုံးဖြစ်ဖွယ်ရှိနေပါတယ်။ ထိုင်းနိုင်ငံခြားရေးဝန်ကြီးဟာ ဒေါ်အောင်ဆန်းစုကြည်ကို နေပြည်တော်ရှိ အချုပ်ထောင်ထဲမှာ သွားရောက်တွေ့ဆုံခဲ့ဖွယ် ရှိနေတယ်လို့ အာဆီယံသံတမန် သတင်းအရင်း အမြစ်တွေရဲ့ပြောဆိုချက်ကို ကိုကားပြီးဂျပန်အခြေစိုက် ကျိုတိုသတင်းဌာန က ဖော်ပြထားပါတယ်။

ထိုင်းနိုင်ငံဟာ နစကနဲ့ နီးစပ်မှုရှိပြီး မြန်မာအရေးအလွတ်သဘောတွေ့ဆုံဆွေးနွေးပွဲကို အိမ်ရှင်အဖြစ် လက်ခံ ကျင်းပပေးခဲ့တဲ့ နိုင်ငံဖြစ်ပါတယ်။ ပြီးခဲ့တဲ့ ဇွန်လမှာ ထိုင်းနိုင်ငံက အိမ်ရှင်အဖြစ် လက်ခံကျင်းပခဲ့တဲ့ မြန်မာအရေး အလွတ်သဘောတွေ့ဆုံဆွေးနွေးပွဲကို အာဆီယံအဖွဲ့ဝင်နိုင်ငံတွေဖြစ်တဲ့ စင်ကာပူ၊ မလေးရှားနဲ့ အင်ဒိုနိးရှားနိုင်ငံတို့ တက်ရောက်ခဲ့ခြင်းမရှိသလို ထိုင်းအစိုးရဲ့လုပ်ဆောင်ချက်များကို ဝေဖန်ပြစ်တင်မှုတွေရှိခဲ့ပါတယ်။