သန့်ဇင် (NSS) - ဇူလိုင် ၉

အင်ဒိုနီးရှားနိုင်ငံက အိမ်ရှင်အဖြစ် လက်ခံကျင်းပသည့် ၂ဝ၂၃ အာဆီယံ အမျိုးသမီး ယူ-၁၉ ပြိုင်ပွဲအဖွင့်ပွဲစဉ်တွင် မြန်မာအမျိုးသမီး ယူ-၁၉ အသင်းမှ ဖိလစ်ပိုင်အမျိုးသမီး ယူ-၁၉ အသင်းကိုအနိုင်ရရှိခဲ့ကြောင်း သိရသည်။

အုပ်စု(ဂ)တွင် ကျရောက်ခဲ့သော မြန်မာအမျိုးသမီး ယူ-၁၉ အသင်းနှင့် ဖိလစ်ပိုင်အမျိုးသမီး ယူ-၁၉ အသင်းတို့သည် ယမန်နေ့ (ဇူလိုင်လ ၈ ရက်) ည ၇နာရီအချိန်တွင် အင်ဒိုနီးရှားနိုင်ငံ၊ ပလန်ဘန်းမြို့ရှိ Jakabaring Athletic Field အားကစားကွင်း၌ ယှဉ်ပြိုင်ကစားခဲ့ခြင်းဖြစ်သည်။

အဆိုပါပြိုင်ပွဲတွင် မြန်မာအမျိုးသမီး ယူ-၁၉ အသင်းမှ ၂ ဂိုး- ၁ ဂိုး ဆိုသောရလဒ်ဖြင့် ဖိလစ်ပိုင်အမျိုးသမီး ယူ-၁၉ အသင်းကို အနိုင်ရရှိခဲ့ခြင်းဖြစ်သည်။

ဖိလစ်ပိုင်အသင်းသည် ပထမပိုင်း မိနစ် ၄ဝ တွင် ဦးဆောင်ဂိုး စတင်ရရှိခဲ့သော်လည်း မြန်မာအသင်းက ဒုတိယပိုင်းအချိန်တွင် ဇင်မိုးပြည့်၊ ယဉ်လွန်းအိမ်တို့၏ သွင်းဂိုးများဖြင့်ပြန်လည် အနိုင်ယူခဲ့ခြင်းဖြစ် သည်။

မြန်မာအမျိုးသမီး ယူ-၁၉ အသင်းတွင် ဂိုးသမား-ဖီးဗေ၊ နောက်တန်း၌ မေသက်မွန်၊ ခင်ဌေးကြည်၊ ယုယုနိုင်၊ ကြယ်စင်၊ အလယ်တန်းတွင် ဖြူဖြူဝင်း၊ ဝေဖူးအိမ်၊ ဝေဟင်ဖြိုး၊ ယွန်းဝတီလှိုင်၊ ရှေ့တန်းတွင် ယဉ်လွန်းအိမ်၊ ဇင်မိုးပြည့်တို့ပါဝင်လာခဲ့ကြသည်ကို တွေ့ရသည်။

ထို့နောက် လူစားဝင်ကစားသများဖြစ်သည့် ဟေမန်စိုး၊ ရွှန်းလဲ့နိုင်၊ သိင်္ဂီထွေး၊ သဲအိမွန်သောင်းတို့ကလည်း ပါဝင်အားဖြည့်ကစားခဲ့ခြင်းဖြစ်သည်။

မြန်မားအမျိုးသမီး ယူ-၁၉ အသင်းသည် လာမည့် ဇူလိုင်လ ၁ဝ ရက် ည ၇ နာရီအချိန်တွင် ထိုင်းအမျိုးသမီး ယူ-၁၉ အသင်းနှင့် ဆက်လက်ယှဉ်ပြိုင်ကစားရမည်ဖြစ်ကြောင်း သိရသည်။