ဂျန်ဇက် (NSS) - ဇူလိုင် ၇

အင်ဒိုနီးရှားနိုင်ငံဟာ ဇူလိုင် ၁၁ ရက်ကနေ ဇူလိုင် ၁၄ ရက်အထိ အာဆီယံနိုင်ငံခြားရေးဝန်ကြီးများအစည်းအဝေး နဲ့ အာဆီယံအပေါင်းအစည်းအဝေး AMM/PMC meeting များကို အိမ်ရှင်အဖြစ်လက်ခံကျင်းပမှာဖြစ်ရာ မြန်မာ ကိုယ်စားပြုအဖြစ် နစကတာဝန်ရှိသူများကို ဖိတ်ကြားမှာမဟုတ်ဘဲ နိုင်ငံရေးနဲ့မပတ်သက်တဲ့သူတွေကိုသာ စေလွှတ်ဖို့  ဖိတ်ကြားဖွယ်ရှိနေတယ်လို့ အင်ဒိုနီးရှားနိုင်ငံခြားရေးဝန်ကြီးက ပြောပါတယ်။ 

အဆိုပါ AMM/PMC အစည်းအဝေးကို နိုင်ငံပေါင်း ၂၉ နိုင်ငံက တက်ရောက်ဖွယ်ရှိနေပြီး လက်ရှိအချိန်အထိ တက်ရောက်ဖို့ စာရင်းပေးထားတဲ့ကိုယ်စားလှယ်ပေါင်း ၁၁၆၅ ဦးရှိနေသလို ဂျာနယ်လစ်  ၄၉၃ ဦး တက်ရောက် သတင်းရယူဖွယ်ရှိနေတယ်လို့ အင်ဒိုနိးရှားနိုင်ငံခြားရေးဝန်ကြီး က ပြောပါတယ်။

အာဆီယံအလှည့်ကျဥက္ကဋ္ဌအဖြစ်တာဝန်ယူနေတဲ့ အင်ဒိုနီးရှားနိုင်ငံဟာ အာဆီယံနိုင်ငံခြားရေးဝန်ကြီးများ အစည်းအဝေး အပါအဝင် အစည်းအဝေး ၁၈ ခုကို ၄ ရက်ကြာ ကျင်းပသွားမှာဖြစ်ပြီး အာဆီယံဥက္ကဋ္ဌ၊ အာဆီယံ အထွေထွေအတွင်းရေးမှူးအပြင် နယူးဇီလန်၊ ရုရှား၊ သြစတြေးလျ၊ တရုတ်၊ ဂျပန်၊ တောင်ကိုရီးယား၊ ဥရောပသမဂ္ဂ၊ ဗြိတိန်၊ ကနေဒါ၊ ASEAN Plus Three (APT)၊  EAS ၊ နဲ့ ARF အဖွဲ့တွေနဲ့ အစည်းအဝေးတွေ ထပ်မံကျင်းပသွားမှာ ဖြစ်တယ်လို့ သိရပါတယ်။ 

အင်ဒိုနီးရှားနိုင်ငံဟာ အာဆီယံအလှည့်ကျဥက္ကဋ္ဌအဖြစ် တာဝန်ယူပြီးနောက် မြန်မာနိုင်ငံရေးအခက်အခဲကို ဖြေရှင်း နိုင်ဖို့ နစက အပြင် အတိုက်ခံအုပ်စုများနဲ့လည်း လျှို့ဝှက်ဆွေးနွေးနေရာ အကြိမ်ပေါင်း အနည်းဆုံး ၆ဝ ကျော် ဆွေးနွေးထားကြောင်း ပြီးခဲ့တဲ့ မေလအစောပိုင်းက ထုတ်ဖော်ပြောဆိုခဲ့ပါတယ်။ 

အင်ဒိုနီးရှားအစိုးရဟာ မြန်မာနိုင်ငံရေးအခက်အခဲကိုဖြေရှင်းဖို့ကြိုးပမ်းရာမှာ quietly engaging နည်းလမ်းကို အသုံးပြုပြီး လူသိရှင်ကြား ထုတ်ဖော်ပြောဆိုခြင်းမျိုး မရှိကြောင်း သိရပါတယ်။