စော (NSS) - ဇူလိုင် ၇

ရန်ကုန်တိုင်း၊ လှိုင်သာယာမြို့နယ်၌ တွဲကားအောက်တွင် ကားဝင်ပြင်သည့် ယာဉ်မောင်းတစ်ဦး တွဲကားကြိတ်မိ၍ သေဆုံးခဲ့ကြောင်း သတင်းရရှိသည်။

ဖြစ်စဉ်မှာ ယနေ့(ဇူလိုင်လ ၇ ရက်)၊ နံနက်(၁ဝ)နာရီအချိန်တွင် လှိုင်သာယာမြို့နယ်၊ စက်မှုဇုန် (၄)၊ ဦးတရုတ်လမ်း၌ အထက်ပါကဲ့သို့ဖြစ်ပွားခဲ့ကြောင်း ကရုဏာတွဲလက်နာရေးကူညီမှုအသင်းထံမှ သိရသည်။

“သူက ကားအောက်ထဲကိုဝင်ပြီးတော့ ချန်ပါအိုးပေါက်နေလားဆိုပြီး ဝင်ကြည့်တာပါ။ ကားကစက်နှိုးထားတော့ သူကကားအောက်ထဲ ဝင်ကြည့်တဲ့အချိန် ကားကလိမ့်သွားပြီး တက်ကြိတ်မိသွားတာပါ”ဟု ကရုဏာတွဲလက်နာရေးကူညီမှုအသင်းမှ တာဝန်ရှိသူတစ်ဦးက NP News ကိုပြောသည်။

ကားကြိတ်ခံရမှုကြောင့် ၎င်း၏ခန္ဓာကိုယ်အောက်ပိုင်းကြေမွသွားပြီး အခင်းဖြစ်ပွားရာနေရာတွင် သေဆုံးသွားကြောင်းသိရသည်။

သေဆုံးသူအမျိုးသားသည် အသက်(၄ဝ)ဝန်းကျင်အရွယ်ရှိကြောင်း ၎င်းကဆက်လက်ပြောဆိုထားသည်။

၎င်း၏ရုပ်အလောင်းအား လှိုင်သာယာဆေးရုံ ရင်ခွဲရုံသို့ ပို့ဆောင်ထားကြောင်း သိရသည်။