စော (NSS) - ဇူလိုင် ၆

အာဆီယံယဉ်ကျေးမှုဖလှယ်ရေး ASEAN Photo Contest 2023 အစီအစဉ်တွင် ပါဝင်နိုင်ကြောင်း ဂျပန်နိုင်ငံ တိုကျိုမြို့ရှိ မြန်မာသံရုံးမှ ထုတ်ပြန်ထားသည်။

ဂျပန်နိုင်ငံ၊ တိုကျိုမြို့ရှိ မြန်မာသံရုံးမှ ယမန်နေ့(ဇူလိုင်လ ၅ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

Sakai-ASEAN Exchange Promotion Committee မှ အာဆီယံယဉ်ကျေးမှုကို သိရှိနား လည်စေရန်ရည်ရွယ်၍ ASEAN Photo Contest 2023 အစီအစဉ်ကို ဇူလိုင်လ ၁ ရက်မှ ဩဂုတ်လ ၄ ရက်အထိ ကျင်းပမည်ဖြစ်ကြောင်း ထုတ်ပြန်ချက်အရသိရသည်။

ထို့ကြောင့် ဂျပန်နိုင်ငံနှင့် အာဆီယံဒေသတွင်း နိုင်ငံများ၌ ရိုက်ကူးထားသည့် အာဆီယံယဉ်ကျေးမှုကို ပုံဖော်စေသော ဓာတ်ပုံများဖြင့် ယှဉ်ပြိုင်နိုင်ကြောင်း အထက်ပါကော်မတီက  မြန်မာသံရုံးသို့ အကြောင်းကြားထားကြောင်း သိရသည်။

အဆိုပါအစီအစဉ်သို့ လျှောက်ထားလိုသူများအနေဖြင့်  အသက် (၁၈)နှစ်အထက်ဖြစ်ရန်လိုပြီး မည်သူမဆို ဝင်ရောက်ယှဉ်ပြိုင်နိုင်ကြောင်း ထုတ်ပြန်ချက်အရသိရသည်။

ထို့ပြင် Sakai City Electronic Application System မှတစ်ဆင့် ဓာတ်ပုံကို ပေးပို့ရန်နှင့် လျှောက်ထားသူ၏ နာမည်၊ စာပို့သင်္ကေတ၊ နေရပ်လိပ်စာ၊ ဖုန်းနံပါတ်နှင့် EMAILများလည်း ထည့်သွင်းဖော်ပြန်ရန်လိုအပ်ကြောင်း ထုတ်ပြန်ချက်တွင် ပါရှိသည်။

အလားတူ မိခင်နိုင်ငံ၊ ရိုက်ကူးထားသည့် နေရာ၊ ခေါင်းစဉ်နှင့် ဓာတ်ပုံတွင် ရေးသားလိုသည့် စာသားများလည်း ထည့်သွင်းရန်လိုပြီး ဓာတ်ပုံတစ်ပုံဖြင့်သာ ဝင်ရောက်ယှဉ်ပြိုင်ရမည်ဖြစ်ကြောင်းထုတ်ပြန်ချက်အရ သိရသည်။

အဆိုပါ ASEAN Photo Contest 2023 တွင် ဆုရသူများနှင့် အခြားပြိုင်ပွဲဝင်များ၏ လက်ရာ(၅ဝ)အား အောက်တိုဘာလ (၁၇)ရက်တွင် Sakai City ခန်းမ၏ ပထမထပ်အပါအဝင် Sakai City Website နှင့် ကော်မတီ၏ Facebook စာမျက်နှာတို့၌ ဖော်ပြသွားမည်ဖြစ်ကြောင်း သိရသည်။

ပြိုင်ပွဲဝင်သူများအတွက် ယန်း (၃)သောင်းတန် အကောင်းဆုံးဆု (၁)ဆု အပြင် ယန်း(၁) သောင်းတန်အထူးဆု (၁)ဆုနှင့် ယန်း(၃)ထောင်တန် အထူးဆု (၇)ဆုတို့ကို ကော်မတီမှ ချီးမြှင့်သွားမည်ဖြစ်ကြောင်း ထုတ်ပြန်ချက်တွင်ပါရှိသည်။