မျိုးကြီး (NSS) - ဇူလိုင် ၆

နစကဥက္ကဋ္ဌ နှင့် ကူဝိတ်နိုင်ငံဝန်ကြီးချုပ်တို့အကြား နှစ်နိုင်ငံပူးပေါင်းဆောင်ရွက်ရေးကိစ္စရပ်များကို တယ်လီဖုန်းဖြင့် ဆက်သွယ်ဆွေးနွေးခဲ့ကြောင်း နစကမှ ထုတ်ပြန်ထားသည်။

ဗိုလ်ချုပ်မှူးကြီးမင်းအောင်လှိုင်နှင့် ကူဝိတ်နိုင်ငံဝန်ကြီးချုပ် His Highness Sheikh Ahmad Nawaf Al-Ahmad Al-Sabah တို့သည် ယမန်နေ့(ဇူလိုင်လ ၅ ရက်)တွင် ဖုန်းဖြင့် ဆက်သွယ်ဆွေးနွေးခဲ့ခြင်းဖြစ်ကြောင်း သိရသည်။

ထိုသို့ဆွေးနွေးရာ၌ နှစ်နိုင်ငံချစ်ကြည်ရေး၊ ပူးပေါင်းဆောင်ရွက်ရေးနှင့်ဆက်ဆံမှုများ တိုးမြှင့်ရေးဆိုင်ရာကိစ္စရပ်များကို ဆွေးနွေးခဲ့ကြကြောင်း နစကမှ သတင်းထုတ်ပြန်ထားသည်။

ပြီးခဲ့သည့် ဇန်နဝါရီလ ၂၄ ရက်တွင် မြန်မာနိုင်ငံဆိုင်ရာ ကူဝိတ်နိုင်ငံသံအမတ်ကြီးအဖြစ် ခန့်အပ်ခံရသော H.E.Mr.Mubarak M A ALadwani သည် ၎င်း၏ သံအမတ်ခန့်အပ်လွှာကို နစကဥက္ကဋ္ဌထံသို့ လာရောက်ပေးအပ်ခဲ့ဖူးသည်။

၎င်းကဲ့သို့ သံအမတ်ခန့်အပ်ပေးပွဲ၌ နစကဥက္ကဋ္ဌ နှင့် ကူဝိတ်သံအမတ်ကြီးတို့အကြား နှစ်နိုင်ငံအပြန်အလှန်ချစ်ကြည်ရေးခရီးစဉ်များ၊ ကုန်သွယ်မှုမြှင့်တင်ဆောင်ရွက်ရေးဆိုင်ရာကိစ္စရပ်များ၊ ခရီးသွားလုပ်ငန်းများတိုးတက်ရေးအတွက် နှစ်နိုင်ငံပူးပေါင်းဆောင်ရွက်ရေးဆိုင်ရာကိစ္စရပ်များကိုလည်း ထည့်သွင်းဆွေးနွေးခဲ့ကြောင်း သိရသည်။

ထို့ပြင် မြန်မာနိုင်ငံနှင့် ကူဝိတ်နိုင်ငံတို့အကြားတွင် ကုန်သွယ်မှု၊ ရင်းနှီးမြှုပ်နှံမှုနှင့် စွမ်းအင်ကဏ္ဍတို့တွင်လည်း နှစ်နိုင်ငံအကျိုးတူပူးပေါင်းဆောင်ရွက်မည့်ကိစ္စရပ်များကိုလည်း ဆွေးနွေးထားကြောင်း သိရသည်။