စော (NSS) - ဇူလိုင် ၁

လာမည့် ပညာသင်နှစ် (၂ဝ၂၄-၂ဝ၂၅)ခုနှစ်တွင် မြန်မာနိုင်ငံ ကုန်သွယ်ရေကြောင်း ကောလိပ်အတွက် အရာရှိလောင်းသင်တန်းသား(၃ဝဝ)ကို ခေါ်ယူသွားမည်ဖြစ်ကြောင်း သိရသည်။

ပို့ဆောင်ရေးနှင့် ဆက်သွယ်ရေးဝန်ကြီးဌာန၊ မြန်မာနိုင်ငံ ကုန်သွယ်ရေကြောင်း ကောလိပ်မှ ယမန်နေ့ (ဇွန်လ ၃ဝ ရက်) တွင် အထက်ပါကဲ့သို့အသိပေးကြေညာထားခြင်းဖြစ်သည်။

အဆိုပါအရာရှိသင်တန်းသား(၃ဝဝ)အနက် ကုန်သွယ်ရေကြောင်းအရာရှိလောင်းသင်တန်းသား(၁၃ဝ)ဦး၊ ကုန်သွယ်ရေကြောင်း အင်ဂျင်နီယာအရာရှိလောင်းသင်တန်းသား(၁၃ဝ)ဦးနှင့် ရေကြောင်းလျှပ်စစ်နည်းပညာအရာရှိလောင်းသင်တန်းသား(၄ဝ)ဦးကို ခေါ်ယူလက်ခံသွားမည်ဖြစ်ကြောင်း သိရသည်။

အရာရှိလောင်း ဒီပလိုမာသင်တန်း အမှတ်စဉ်(၁၇)ကို လာမည့် (၂ဝ၂၄)ခုနှစ်၊ ဖေဖော်ဝါရီလတွင် ကုန် သွယ်ရေကြောင်းအရာရှိလောင်းသင်တန်း၊ ကုန်သွယ်ရေကြောင်း အင်ဂျင်နီယာအရာရှိလောင်းသင်တန်းနှင့် ရေကြောင်းလျှပ်စစ်နည်းပညာအရာရှိလောင်းသင်တန်းများကို ဖွင့်လှစ်သွားမည်ဖြစ်ကြောင်း သိရသည်။

လျှောက်ထားလိုသူများသည် တက္ကသိုလ်စာမေးပွဲတွင် ရူပဗေဒ၊ ဓာတုဗေဒဘာသာရပ်များ ပါဝင်သောဘာသာတွဲများဖြင့် အောင်မြင်ရမည်ဖြစ်ပြီး စုစုပေါင်းရမှတ်အနည်းဆုံး(၄ဝဝ)ရရှိရန်လိုအပ်ကြောင်း သိရသည်။

ထို့ပြင် လျှောက်ထားလိုသူများအနေဖြင့် (၂ဝ၂၃)ခုနှစ်၊ ဒီဇင်ဘာလ(၃၁)ရက်တွင် အသက်(၁၉)နှစ်ထက် မကျော်လွန်သူဖြစ်ရန်လိုအပ်ကြောင်း ထုတ်ပြန်ချက်အရ သိရသည်။

အဆိုပါသင်တန်းများသည် သင်တန်းကာလ(၂)နှစ်စီကြာမြင့်မည်ဖြစ်ကြောင်းသိရပြီး လျှောက်လွှာများကို ဇူလိုင်လ(၇)ရက်မှ စက်တင်ဘာလ(၁)ရက်အထိ လက်ခံသွားမည်ဖြစ်ကြောင်း ထုတ်ပြန်ချက်တွင်ပါရှိသည်။