NSS - ဇွန် ၂၉

ယခု ဇွန်လ နောက်ဆုံးပတ်အတွင်း ရန်ကုန် အိမ်ခြံမြေဈေးကွက်အတွင်း အငှားဈေးကွက် ခပ်သွက်သွက်ဖြစ်လာကြောင်း အိမ်ခြံမြေအကျိုးဆောင်များထံမှ သိရသည်။

ငှားရမ်းမှုအများဆုံးမြို့နယ်များသည် သင်္ဃန်ကျွန်း၊ သာကေတ၊ ဒေါပုံ၊ လှိုင်၊ ကမာရွတ်၊ ဆင်ခြေဖုန်းမြို့နယ်များဖြစ်သည့် ဒဂုံလေးမြို့နယ် နှင့် ရွှေပေါက်က္ကံ ၊ ရွှေပြည်သာ ၊ လှိုင်သာယာမြို့နယ်များဖြစ် ကြောင်းသိရသည်။

"လက်ရှိ အိမ်ခြံမြေဈေးကွက်က အရောင်းအဝယ်လည်း အနည်းငယ်ဖြစ်လာနေတယ်။ သိန်းထောင်ချီတဲ့ အိမ်တွေ အနည်းအကျဉ်း အရောင်းအဝယ်ဖြစ်တယ်။ အိမ်ခြံမြေဈေးကွက်ထဲ လက်ရှိကာလမှာကတော့အရောင်းအဝယ်ဖြစ်တာထက် အငှားကတော့ ပိုဖြစ်လာတယ်။ နှစ်တိုင်းကဒီလိုပဲ ဝါမဝင်ခင် အိမ်အပြောင်း အရွှေ့အတွက် ဒီကာလအငှားပိုလိုက်တယ်။ ဝါဝင်ပြီးရင်တော့ အနည်းဆုံ သုံးလေးလကတော့ အငှားဈေးကွက်လည်း ပြန်အေးသွားတတ်တယ်"ဟု အိမ်ခြံမြေအကျိုးဆောင်တစ်ဦးက ပြောသည်။

မြို့တွင်းမြို့နယ်များအနေဖြင့် အိမ်အငှားခဈေးနှုန်း ပိုမိုမြင့်မားပြီး မြို့အစွန်ပိုင်း မြို့နယ်တွင် အိမ်ငှားရမ်းခ သက်သာမှုရှိကြောင်းသိရသည်။

လက်ရှိ အိမ်အငှားဈေးကွက်တွင် ယခင်က ငွေကျပ်(၁)သိန်းအောက်ဈေးရှိနေသည့် အငှားခန်းများသည် လက်ရှိတွင် ငွေကျပ် (၂)သိန်းဝန်းကျင်မှ (၃)သိန်းကြားအထိ ဈေးတက်လာပြီး အမြင့်ဆုံးအငှားဈေးနှုန်းသည် ငွေကျပ် (၅)သိန်းမှ သိန်းဆယ်ချီအထိ ရှိနေကြောင်းသိရသည်။