စော (NSS) - ဇွန် ၂၉

ကရင်ပြည်နယ်၊ ကြာအင်းဆိပ်ကြီးမြို့နယ်၊ ကရာနီးကျေးရွာတွင် ဆိုင်ကယ်တစ်စီးအရှိန်လွန်ကာ ခြံစည်းရိုးအုတ်တိုင်ကို ဝင်တိုက်မိပြီး အမျိုးသားတစ်ဦး သေဆုံးခဲ့ကြောင်း သိရသည်။

ဖြစ်စဉ်မှာ ယနေ့(ဇွန်လ ၂၉ ရက်)၊ မွန်းလွဲ (၁၁)နာရီအချိန်တွင် ကရာနီးကျေးရွာ၊ ကျိုက်ဒုံကားလမ်း၊ ညောင်ပင်ကွေ့နား၌ အထက်ပါကဲ့သို့ဖြစ်ပွားခဲ့ကြောင်း ကြာအင်းဆိပ်ကြီးမြို့နယ် အရေးပေါ်ကယ်ဆယ်ရေးအဖွဲ့ထံမှ သိရသည်။

အဆိုပါအမျိုးသားသည် ကျိုင်းဒုံဘက်မှ  ဆိုင်ကယ်မောင်းနှင်လာစဉ် အရှိန်လွန်တိမ်းမှောက်ကာ  အခင်း ဖြစ်ပွားရာနေရာတွင် သေဆုံးသွားကြောင်း သိရသည်။

“မြင်တဲ့လူတွေပြောတာတော့ သူမောင်းလာတဲ့အရှိန်က တော်တော်များတယ်ပြောတယ်။ အရှိန်လွန်ပြီး ရေမြောင်းဘေးက ခြံစည်းရိုးအုတ်တိုင်နဲ့ဝင်တိုက်မိတယ်ထင်တယ်။ အဲဒီခြံစည်းရိုးအုတ်တိုင်တောင် ကျွတ်ထွက်သွားတယ်”ဟု ကြာအင်းဆိပ်ကြီးမြို့နယ် အရေးပေါ်ကယ်ဆယ်ရေးအဖွဲ့ မှ တာဝန်ရှိသူတစ်ဦးက NP News ကိုပြောသည်။

သေဆုံးအမျိုးသားသည် ဦးအောင်သန်းငွေ (၅၉) နှစ်ဖြစ်ပြီး ကြခတ်ချောင်းကျေးရွာတွင် နေထိုင်သူဖြစ်ကြောင်း ၎င်းနှင့်ပါလာသည့် မှတ်ပုံတင်ထံမှသိရသည်။

လက်ရှိတွင် ၎င်း၏ရုပ်အလောင်းအား ကြာအင်းဆိပ်ကြီးရင်ခွဲရုံသို့ ပို့ဆောင်ထားပြီး အဆိုပါအမျိုးသားတွင် ပါလာသောပစ္စည်းများကို ရပ်ကွက်အုပ်ချုပ်ရေးမှူးထံတွင် အပ်နှံထားကြောင်း သိရသည်။