စော (NSS)- ဇွန် ၂၉

ရန်ကုန်တိုင်း၊ ပုဇွန်တောင် နှင့် ဒေါပုံမြို့နယ်ကိုဆက်သွယ်ထားသည့် မဟာဗန္ဓုလတံတားပေါ်မှ အသက်(၄ဝ)ကျော်အရွယ် အမျိုးသမီး(၁)ဦး ခုန်ချခဲ့ကြောင်း သိရသည်။

ဖြစ်စဉ်မှာ ယနေ့(ဇွန်လ ၂၉ ရက်)၊ နံနက် (၁၂)နာရီဝန်းကျင်အချိန်တွင် အထက်ပါကဲ့သို့ဖြစ်ပွားခဲ့ကြောင်း စေတနာလူမှုကူညီရေးအသင်းထံမှ သိရသည်။

“ကျွန်တော်တို့ရောက်တဲ့အချိန်မှာတော့ ကုန်းပေါ်ရောက်နေပါပြီ။ အသက်ကရှင်ပါတယ်။ ဘာထိခိုက်ဒဏ်ရာမှမရပါဘူး။ ဒါပေမယ့် ဆေးရုံမှာ စစ်ဆေးချက်ယူရမှာပေါ့”ဟု အထက်ပါအသင်းထံမှ တာဝန်ရှိသူတစ်ဦးက NP News ကိုပြောသည်။

၎င်းအား ငါးဖမ်းသမားများက ကယ်ဆယ်ထားခြင်းဖြစ်ပြီး လက်ရှိတွင် ရန်ကုန်အရှေ့ပိုင်းဆေးရုံသို့ပို့ဆောင်ထားကြောင်း သိရသည်။

“မဝင်းဝင်းခိုင်လို့ပြောတယ် အသက်ကတော့(၄၂)နှစ်။ နေရပ်လိပ်စာကတော့ ရဲတွေမေးနေတယ်။ စုံစမ်းဆဲပဲပေါ့။ မသေချာဘူး ဘာလိုလဲဆိုတော့သူလျှောက်ပြောတာလဲဖြစ်နိုင်တယ်”ဟု ၎င်းကဆက်လက်ပြောဆိုထားသည်။

လက်ရှိတွင် ခုန်ချရသည့်အကြောင်းအရင်းကို မသိရှိရသေးသော်လည်း နယ်မြေခံရဲများက အဆိုပါအမျိုးသမီးအကြောင်းကို ဆက်လက်စုံစမ်းလျက်ရှိကြောင်း သိရသည်။