NSS - ဇွန် ၂၈

မန္တလေးတိုင်း ရွှေလုပ်ငန်းရှင်များအသင်းက ရွှေတစ်ကျပ်သား ကျပ်သိန်းသုံးဆယ် သုံးသောင်းနှုန်းဖြင့်ရောင်းချပေးနေရာ ပြင်ပရွှေဈေးထက် ဈေးလျော့ရောင်းပေးခြင်းကြောင့် လာရောက်တန်းစီဝယ်ယူသူများနေပြီး မဲနှိုက်စနစ်ဖြင့်သာ ရောင်းချပေးမည်ဖြစ်ကြောင်း သိရသည်။

ယခင်ရက်ပိုင်းက ဦးသူတန်းစီစနစ်ဖြင့် ရောင်းချပေးနေရာမှ နေရာဦးပြီး ပြန်ရောင်းစားသူအချို့ရှိလာ ခြင်းကြောင့် အမှန်တကယ် ရွှေဝယ်ယူလိုသူများ ဝယ်မရဖြစ်ခဲ့ကြောင်းသိရသည်။

မန္တလေးရွှေအသင်းအနေဖြင့် ဇွန်လ၂၈ ရက်မှစတင်ကာ တန်းစီဦးသူရောင်းပေးစနစ်မဟုတ်ပဲ မဲစနစ်ဖြင့် တန်းတူညီမျှရောင်းချပေးမည်ဖြစ်ပြီး နောက်ရက်များတွင်လည်း တန်းစီစရာမလိုဘဲ တန်းတူမဲနှိုက်စနစ်ဖြင့်သာ ရောင်းချပေးတော့မည်ဖြစ်ကြောင်း အသင်းရုံးကထုတ်ပြန်ထားသည်။

ယနေ့ (ဇွန်လ ၂၈ ရက်)မန္တလေးရွှေအသင်းက ရောင်းချသည့် ရွှေဈေးသည် အခေါက်ရွှေတစ်ကျပ်သားလျှင် ငွေကျပ်သိန်း (၃ဝ၃ဝဝဝဝ) ကျပ်ဖြစ်ကြောင်း သိရသည်။

လာမည့် ဇွန်လ (၂၉)ရက် အီးဒ်နေ့တွင် အရောင်းတစ်ရက်ပိတ်ထားမည်ဖြစ်ကြောင်း သိရသည်။

မန္တလေးရွှေအသင်းက ဇွန်လ ၂ဝ ရက်မှစတင်ကာ လူတစ်ဦးလျှင် ရွှေတစ်ကျပ်သားနှုန်း ရောင်းချပေးနေခြင်းဖြစ်ပြီး ဇွန်လ ၂၆ ရက်အထိ ရွှေ ၂၃၇ ကျပ်သားရောင်းချထားပြီး စုစုပေါင်း ရွှေတစ်ကျပ်သားအတုံး (၇၃ဝ) ခန့်အထိ ဆက်လက်ရောင်းချပေးသွားမည်ဖြစ်ကြောင်းသိရသည်။