Pearl (NSS) - ဇွန် ၂၇

တောင်ကြီးမြို့၌ကျင်းပသော မူးယစ်ဆေးဝါးများမီးရှို့ဖျက်ဆီးသည့်အခမ်းအနားသို့ တက်ရောက်ခဲ့သည့် ကျောင်းသား/သူ အချို့ မူးမေ့သတိလစ်မှုဖြစ်ပွားခဲ့ကြောင်း တောင်ကြီးမြို့နယ်ကြက်ခြေနီသူနာပြုတပ်ဖွဲ့ထံမှ သတင်းရရှိသည်။ 

ဖြစ်စဉ်မှာ ယမန်နေ့ (ဇွန်လ ၂၆ ရက်) ၊ နေ့လည် (၁၁) နာရီအချိန်တွင် ရှမ်းပြည်နယ်၊ တောင်ကြီးမြို့၊  အဝေရာမီးပုံးပျံကွင်း၌ကျင်းပသော အပြည်ပြည်ဆိုင်ရာ မူးယစ်ဆေးဝါးတိုက်ဖျက်ရေးနေ့အခမ်းအနား၌ ဖြစ်ပွားခဲ့ခြင်းဖြစ်သည်။

အဆိုပါ အခမ်းအနား၌ ရှမ်းပြည်နယ် နှင့် ကယားပြည်နယ်တို့မှ တစ်နှစ်တာ ဖမ်းဆီးရမိသည့် မူးယစ်ဆေးဝါး ၂၃ မျိုးနှင့် ဓာတုပစ္စည်း ၅၂ မျိုး၊ စုစုပေါင်းတန်ဖိုး မြန်မာငွေကျပ် ၃၅၅ ဒသမ ၂၆၈ ဘီလျံကျော်(အမေရိကန်ဒေါ်လာ ၁၆၉ ဒသမ ၁၇၅ သန်း)အား ဖျက်ဆီးခဲ့ကြောင်း သိရသည်။

ထိုသို့ မီးရှို့ဖျက်ဆီးခြင်းများပြုလုပ်ရာ အခမ်းအနားသို့ တတ်ရောက်ခဲ့သည့် တာဝန်ရှိသူများနှင့် ကျောင်းသား/သူများ အနက် ကျောင်းသား/သူ အချို့ မူးမေ့ ၊ သတိလစ်မှုများဖြစ်ပွားခဲ့ကြောင်း သိရသည်။ 

အဆိုပါ မူးမေ့ ၊ သတိလစ် ကျောင်းသား/သူများအား တောင်ကြီးခရိုင်ကြက်ခြေနီ ကြီးကြပ်မှုကော်မတီအဖွဲ့ဝင်များ၊ တောင်ကြီးမြို့နယ် နှင့် ရပ်စောက်မြို့နယ် ကြက်ခြေနီအဖွဲ့ဝင်များ၊ စေတနာ့လုပ်အားရှင်တို့မှ ရှေးဦးပြုစုပေးခဲ့ကြောင်း သိရသည်။

ထိုသို့ ရှေးဦးပြုစုပေးနောက် လိုအပ်သောလူနာများအား ဆေးရုံသို့ပို့ဆောင်‌ပေးခဲ့ကြောင်း ကြက်ခြေနီ အသင်းမှ ဆိုသည်။