မျိုးကြီး (NSS) - ဇွန် ၂၅

၂ဝ၂၄ ခုနှစ် သန်းခေါင်စာရင်းကောက်ယူရန် မြေပုံရေးဆွဲခြင်းနှင့် စာရင်းကောက်ကွက်ဖွဲ့ခြင်းလုပ်ငန်းများအတွက် နိုင်ငံတကာအကြံပေးပုဂ္ဂိုလ် အဆိုပြုလွှာခေါ်ယူလျက်ရှိနေသည်။

၎င်းအဆိုပြုလွှာကို နစက၏ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနက ခေါ်ယူနေခြင်းဖြစ်ပြီး အဆိုပြုလွှာများကို ဇူလိုင်လ ၁၄ ရက် နောက်ဆုံးထားကာ ဝန်ကြီးဌာနသို့ တင်သွင်းရမည်ဖြစ် ကြောင်း ကြေညာထားသည်။

အကြံပေးပုဂ္ဂိုလ်ငှားရမ်းခြင်း၏ ရည်ရွယ်ချက်သည် ၂ဝ၂၄ ခုနှစ်တွင် ကောက်ယူရန်လျာထားသည့် သန်းခေါင်စာရင်းလုပ်ငန်းအောင်မြင်မှု၏ အဓိကျသည့် မြေပုံရေးဆွဲခြင်းနှင့် စာရင်းကောက်ကွက်ဖွဲ့စည်းခြင်းလုပ်ငန်းနှင့်ပတ်သက်၍ နည်းပညာပိုင်းဆိုင်ရာ အကြံဉာဏ်များ ပံ့ပိုးပေးရန်ဖြစ်ကြောင်း ဝန်ကြီးဌာနက ဆိုသည်။

ထို့ပြင် အကြံပေးပုဂ္ဂိုလ်သည် တိုင်းနှင့်ပြည်နယ်များတွင် ကွင်းဆင်းဆောင်ရွက်နေသော မြို့ပြ Census Unit များ ဖွဲ့စည်းခြင်းအား ပြည်သူ့အင်အားဦးစီးဌာန အရာထမ်းများနှင့်အတူ သွားရောက်စစ်ဆေးရမည်ဟု တာဝန်များ သတ်မှတ်ပေးထားသည်။

အကြံပေးပုဂ္ဂိုလ်အနေဖြင့် ဖွဲ့စည်းထားသော မြို့ပြနှင့်ကျေးလက် Census Unit များကို အခြေခံ၍ တစ်နိုင်ငံလုံး၏ စာရင်းကောက်ကွက်မြေပုံများ ဖွဲ့စည်းပေးရန်အပါအဝင် အခြားသောတာဝန်များကို ထမ်းဆောင်ရမည်ဟုလည်း ဝန်ကြီးဌာနက ကြေညာထားသည်။

ထို့ပြင် အကြံပေးပုဂ္ဂိုလ်သည် စာချုပ်လက်မှတ်ရေးထိုးပြီးနောက် ၂ဝ၂၃ ခုနှစ် စက်တင်ဘာလမှစ၍ ၂ဝ၂၄ ခုနှစ် မတ်လအထိ တာဝန်ထမ်းဆောင်ရမည်ဖြစ်ကြောင်း သိရသည်။

သို့သော် နိုင်ငံတကာအကြံပေးပုဂ္ဂိုလ်အနေဖြင့် မြန်မာနိုင်ငံအစိုးရလျှို့ဝှက်ချက်အက်ဥပဒေအပါအဝင် နိုင်ငံတော်က ပြဋ္ဌာန်းထားသည့် တည်ဆဲဥပဒေများအားလုံးကို လိုက်နာရမည်ဖြစ်ကြောင်း ဝန်ကြီးဌာနက ကြေညာထားသည်။

ထိုသို့ လိုက်နာခြင်းမရှိဘဲ ပြစ်မှုကျူးလွန်ပါက ဥပဒေအရ အရေးယူခြင်းခံရမည်ဟုလည်း လူဝင်မှုကြီး ကြပ်ရေးနှင့်ပြည်သူ့အင်အားဝန်ကြီးဌာနက ဆိုထားသည်။