Pearl (NSS) - ဇွန် ၂၄

ကျေးလက်ဒေသဖွံ့ဖြိုးတိုးတက်ရေးဦးစီးဌာနတွင် လစ်လပ်နေသော အငယ်တန်းအင်ဂျင်နီယာရာထူးနေရာ (၂ဝဝ) နီးပါးအတွက် လျှောက်လွှာများခေါ်ယူနေကြောင်း ‌သမဝါယမနှင့် ကျေးလက်ဖွံ့ဖြိုးရေး ဝန်ကြီးဌာနမှ ထုတ်ပြန်ထားသည်။ 

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာနမှ ယနေ့ (ဇွန်လ ၂၄ ရက်)တွင် နိုင်ငံပိုင်သတင်းစာများမှတစ်ဆင့် အထက်ပါကဲ့သို့ ထုတ်ပြန်ကြေညာထားခြင်းဖြစ်သည်။ 

‌သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနတွင် အငယ်တန်းအင်ဂျင်နီယာ-၃ (မြို့ပြ)ရာထူး အတွက် (၁၁ဝ) နေရာ နှင့် အငယ်တန်းအင်ဂျင်နီယာ-၄ (မြို့ပြ)ရာထူးအတွက် (၇၉) နေရာ လစ်လပ်နေကြောင်း သိရသည်။

အငယ်တန်းအင်ဂျင်နီယာ - ၃(မြို့ပြ)ရာထူးအတွက် လျှောက်ထားလိုသူများသည် လာမည့် ဇူလိုင်လ ၊ (၃၁)ရက်တွင် အသက် (၃၂)နှစ်မကျော်ရန်လိုအပ်ပြီး  မြို့ပြအင်ဂျင်နီယာဆိုင်ရာ ဘွဲ့တစ်ခုခုရရှိသူဖြစ်ရမည်ဖြစ်ကြောင်း သိရသည်။ 

 အလားတူ အငယ်တန်းအင်ဂျင်နီယာ - ၄ (မြို့ပြ)ရာထူးအတွက် လျှောက်ထားလိုသူများသည်  ဇူလိုင်လ (၃၁)ရက်တွင် အသက် (၃ဝ)နှစ်မကျော်ရန်လိုအပ်ပြီး  မြို့ပြအင်ဂျင်နီယာဆိုင်ရာ ဘွဲ့ / ဒီပလိုမာ တစ်ခုခုရရှိသူဖြစ်ရမည်ဖြစ်ကြောင်း သိရသည်။ 

အဆိုပါရာထူးများအတွက်လျှောက်ထားလိုသူများအနေဖြင့် ဝန်ထမ်းဖြစ်ပါက (၃၅)နှစ်မကျော်ရန် လိုအပ်ပြီး သက်ဆိုင်ရာဝန်ကြီးဌာနနှင့် အဖွဲ့အစည်းအကြီးအမှူး၏ ခွင့်ပြုချက်ဖြင့် လျှောက်ထားရမည်ဖြစ် ကြောင်း သိရသည်။ 

ထို့ပြင် ဌာနတွင် အနည်းဆုံး (၃)နှစ် ဒေသမရွေးတာဝန်ထမ်းဆောင်နိုင်ရမည်ဖြစ်ပြီး  ရေးဖြေစာမေးပွဲကို သက်ဆိုင်ရာ တိုင်း/ပြည်နယ်အလိုက်ပြုလုပ်မည်ဖြစ်ရာ ဖြေဆိုလိုသည့် တိုင်း/ပြည်နယ်အား လျှောက် လွှာတွင် ထင်ရှားစွာဖော်ပြရန်လိုအပ်ကြောင်း သိရသည်၊

စာမေးပွဲ၌ မြန်မာစာ အင်္ဂလိပ်စာ နှင့် အထွေထွေဗဟုသုတတို့ဖြေဆိုရမည်ဖြစ်ပြီး စာမေးပွဲကျင်းပမည့် နေ့ရက်၊ နေရာ နှင့် အချိန်တို့ကို သက်ဆိုရာဌာနရုံးများတွင် ကြိုတင်ကြေညာမည်ဖြစ်ကြောင်း သိရသည်။