သန့်ဇင် (NSS) - ဇွန် ၂၁

စစ်ကိုင်းတိုင်းဒေသကြီး၊ ကလေးမြို့နယ်၌ ငွေကျပ်သိန်း(၃ဝဝဝ)ကျော်တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ သတင်းထုတ်ပြန်ထားသည်။

ယမန်နေ့ (ဇွန်လ ၂ဝ ရက်)၊ ညနေ ၃နာရီခွဲအချိန်တွင် သတင်းအရ စစ်ကိုင်းတိုင်း၊ ကလေးမြို့၊ အောင်မင်္ဂလာရပ်ကွက်၊ စံပယ်လမ်း၌ အောင်လှိုင်သန်း(ခ)ဖိုးလုံး(၄၅)နှစ်အား ရှာဖွေစစ်ဆေးခဲ့ကြောင်း သိရသည်။

ထိုသို့ရှာဖွေခဲ့ရာ ၎င်းထံမှ စိတ်ကြွရူးသွပ်ဆေးပြား(၂ဝဝဝ)၊ ကာလတန်ဖိုးအားဖြင့် ငွေကျပ်သိန်း(၅ဝ)ခန့်နှင့် လက်ကိုင်ဖုန်း(၁)လုံးတို့အား သိမ်းဆည်းရမိခဲ့ကြောင်း သိရသည်။

ထို့နောက် ကွင်းဆက်စစ်ဆေးချက်အရ ညနေ ၃နာရီ ၄ဝ မိနစ်အချိန်အတွင် စိတ်ကြွရူးသွပ်ဆေးပြားများ ရောင်းချသူ ကံ့ကော်ဦး(၂၈)နှစ်အား ၎င်းနေထိုင်သည့် စံပယ်လမ်းရှိနေအိမ်၌ ဖမ်းဆီးရမိခဲ့ကြောင်း အသိပေးထုတ်ပြန်ထားသည်။

ဆက်လက်စစ်ဆေးဖော်ထုတ်ချက်အရ ကံ့ကော်ဦး၏ နေအိမ်တွင် စိတ်ကြွရူးသွပ်ဆေးပြား (၁၅ဝဝဝဝ) ခန့်၊ ကာလတန်ဖိုးငွေကျပ်သိန်း(၃ဝဝဝ)နှင့် လက်ကိုင်ဖုန်း(၁)လုံးတို့ကို ထပ်မံသိမ်းဆည်းရမိခဲ့ကြောင်း သိရသည်။

လက်ရှိတွင် ၎င်းတို့(၂)ဦးအား ဥပဒေအရ အရေးယူထားပြီး ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်စစ်ဆေးလျက်ရှိကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ ထုတ်ပြန်ထားသည်။