ဂျန်ဇက် (NSS) - ဇွန် ၁၇

ယူကရိန်းကို ထောက်ပံ့ပေးမယ့်  အနောက်အုပ်စုနိုင်ငံများရဲ့ အက်ဖ် ၁၆ တိုက်လေယာဉ်များဟာ ဂျာမနီနိုင်ငံထုတ် Leopard တင့်ကားများလိုမျိုး စစ်ပွဲအတွင်း မီးလောင်ပျက်စီးသွားဖွယ်ရှိနေကြောင်း ရုရှား သမ္မတပူတင်က ထုတ်ဖော်ပြောဆိုလိုက်ပါတယ်။ 

ယူကရိန်းကို အက်ဖ် ၁၆ တိုက်လေယာဉ်များ ကူညီထောက်ပံ့ပေးခြင်းကြောင့် နေတိုးအုပ်စုနဲ့ ရုရှားနိုင်ငံကြား စစ်ပွဲဖြစ်လာနိုင်ဖွယ်ရှိနေကြောင်း ရုရှားသမ္မတပူတင်က ထုတ်ဖော်ပြောဆိုလိုက်ပါတယ်။ ယူကရိန်းဟာ သိမ်းပိုက်ခံထားရတဲ့ နယ်မြေတွေကို ပြန်လည်ရယူနိုင်ဖို့ ဒီလအစောပိုင်းမှာ ရုရှားကို တန် ပြန်ထိုးစစ်ဆင်မှုများလုပ်ဆောင်ခဲ့ရာ ယူကရိန်းကို  ထောက်ပံ့ပေးထားတဲ့အနောက်အုပ်စုနိုင်ငံများရဲ့စစ်လက်နက်ပစ္စည်းအများအပြား ပျက်စီးဆုံးရှုံးသွားခဲ့တယ်လို့ ရုရှား သမ္မတပူတင်က ပြီးခဲ့တဲ့ရက်ပိုင်းမှာပြောခဲ့ဖူးပါတယ်။ အနောက်အုပ်စုနိုင်ငံတွေဟာ ယူကရိန်းသမ္မတ ဇီလန်စကီး တောင်းဆိုထားတဲ့အတိုင်း အက်ဖ် ၁၆ တိုက်လေယာဉ်များကူညီပံ့ပိုးပေးသွားဖွယ် ရှိနေကြောင်းသိရပါတယ်။

သမ္မတပူတင်က "ယူကရိန်းဟာ တန်ပြန်ထိုးစစ်ဆင်ခဲ့တယ်။ အဲဒီတန်ပြန်ထိုးစစ်အတွင်းမှာပဲ ယူကရိန်းကို အနောက်အုပ်စုနိုင်ငံတွေက ပံ့ပိုးထားတဲ့ တင့်ကားတွေ မီးလောင်ပျက်စီးခဲ့ရတယ်။ အက်ဖ် ၁၆ တိုက်လေယာဉ်တွေဟာလည်း တင့်ကားတွေလိုမျိုး မီးလောင်ပျက်စီးမယ်ဆိုတာ သံသယဖြစ်စရာမလိုပါဘူး"လို့ပြောပါတယ်။

အနောက်အုပ်စုနိုင်ငံတွေဟာ ယူကရိန်းတိုက်လေယာဉ်မှူးများကို  အက်ဖ် ၁၆ တိုက်လေယာဉ်များအသုံး ပြုပုံများ လေ့ကျင့်သင်ကြားပေးနေပေမယ့် တိုက်လေယာဉ်များလွှဲပြောင်းပေးခြင်းမျိုး မရှိသေးကြောင်းသိရပါတယ်။ နေတိုးအုပ်စုဟာ ယူကရိန်းကို စစ်လက်နက်ပစ္စည်းများ ပိုမိုကူညီထောက်ပံ့ပေးပြီး စစ်ပွဲအချိန်ပိုကြာအောင်လုပ်ဆောင်နေကြောင်း၊ ထိပ်တိုက်တွေ့ဆုံမှု အန္တရာယ်တွေပိုမိုဖြစ်လာနိုင်ကြောင်း ရုရှားဘက်က သတိပေးထားပါတယ်။ အမေရိကန် နဲ့ အနောက်အုပ်စုနိုင်ငံတွေဟာ ယူကရိန်းကိုစစ်ပွဲမှာအနိုင်ရစေဖို့ ရည်ရွယ်ပြီး ငွေကြေး၊ စစ်လက်နက်ပစ္စည်းများ၊ ကျည်ဆံများ၊ ထောက်လှမ်းရေးအချက်လက်များအပြင် လေကျင့်သင်ကြားပေးမှုများလုပ်ဆောင်နေကြောင်းသိရပါတယ်။