Pearl (NSS) - ဇွန် ၁၄

တက္ကသိုလ်ဝင်စာမေးပွဲအောင်မြင်ခဲ့သော အကျဉ်းသား၊ အကျဉ်းသူများအနေဖြင့် ပညာသင်ကြားခွင့် ဆက်လက်ရရှိရေးဆောင်ရွက်ပေးရန် တိုက်တွန်းသွားမည်ဖြစ်ကြောင်း မြန်မာနိုင်ငံအမျိုးသားလူ့အခွင့်အရေးကော်မရှင်မှဆိုသည်။

မြန်မာနိုင်ငံအမျိုးသားလူ့အခွင့်အရေးကော်မရှင်မှ ယမန်နေ့ (ဇွန်လ ၁၃ ရက်) ၊ ညပိုင်းတွင် အထက်ပါကဲ့သို့ ပြောဆိုထားခြင်းဖြစ်သည်။ 

အဆိုပါ ကော်မရှင်သည် ၂ဝ၂ဝ ပြည့်နှစ်၊ ဇန်နဝါရီလ မှ ၂ဝ၂၃ ခုနှစ်၊ မေလအတွင်း အကျဉ်းထောင် ၅၄ ခု၊ အကျဉ်းစခန်း ၃၈ ခု၊ ဘိုးဘွားရိပ်သာ၊ မသန်စွမ်းကျောင်းနှင့် လူငယ်သင်တန်းကျောင်း ၂၆ ခု တို့ကို သွား ရောက်ကြည့်ရှုစစ်ဆေးခဲ့ကြောင်း သိရသည်။ 

ထိုသို့ သွားရောက်ကြည့်ရှုစစ်ဆေးရာ အကျဉ်းထောင်၊ အကျဉ်းစခန်းများတွင် ထိန်းသိမ်းစောင့်ရှောက်ထားသော အကျဉ်းသား၊ အကျဉ်းသူများမှ ပညာဆက်လက်သင်ယူလိုကြောင်း တင်ပြသည့် အကျဉ်း သား၊ အကျဉ်းသူများကို ပညာဆက်လက် သင်ယူနိုင်ရေးအတွက် သက်ဆိုင်ရာဌာနမှ စိစစ်ဆောင်ရွက်ပေးနိုင်ရေး အကြံပြုတိုက်တွန်းချက်များ ပေးပို့ခဲ့ကြောင်း သိရသည်။ 

ပြီးခဲ့သည့် ၂ဝ၂၂-၂ဝ၂၃ ခုနှစ် ပညာသင်နှစ်အတွက် တက္ကသိုလ်ဝင်စာမေးပွဲကို အင်းစိန်အကျဉ်းထောင် အပါအဝင် မန္တလေး၊ ရမည်းသင်း၊ လွိုင်ကော်၊ ဘားအံ၊ နေပြည်တော်နှင့် ပဲခူးအကျဉ်းထောင်တို့မှ အကျဥ်းသား (၄၈)ဦး ဖြေဆိုခဲ့ရာ အကျဥ်းသား(၄၄)ဦးအောင်မြင်ခဲ့ပြီး ၎င်းတို့အနက်မှ (၄၁)ဦးသည် ဂုဏ်ထူးဖြင့် အောင်မြင်ခဲ့သည်။

ထို့ကြောင့် ဖြေဆိုသည့် အကျဉ်းသားအားလုံး၏ အောင်မြင်မှုရာခိုင်နှုန်းသည် ၉၁ ဒသမ ၆၇ ရာခိုင်နှုန်းရှိပြီး မြန်မာနိုင်ငံအမျိုးသား လူ့အခွင့်အရေးကော်မရှင်အနေဖြင့် တက္ကသိုလ်ဝင်တန်းအောင်မြင်သည့် အကျဉ်းသား၊ အကျဉ်းသူများ၏ ပညာသင်ကြားခွင့် အခွင့်အရေး ဆက်လက်ရရှိနိုင်ရေးအတွက် ဆောင်ရွက်ပေးသွားရန် စဉ်ဆက်မပြတ်တိုက်တွန်းသွားမည် ဖြစ်ကြောင်းထုတ်ပြန်ထားသည်။