NSS - ဇွန်  ၁၃

ကရင်ပြည်နယ်၊ မြဝတီမြို့ရှိ စည်ပင်နယ်နိမိတ်အတွင်း ဖွင့်လှစ်ထားသည့် တက်တူးဆိုင်များအား ယခုလ (ဇွန်လ) ၁ဝ ရက်မှစတင်ပြီး ပိတ်သိမ်းရန်ညွှန်ကြားချက်ထွက်ပေါ်လာကြောင်း မြဝတီမြို့ခံများထံမှသိရသည်။ 

မြို့နယ်စည်ပင်နယ်နိမိတ်အတွင်းရှိသည့် တက်တူးဆိုင်များကို ပိတ်သိမ်းခိုင်းခြင်းဖြစ်ပြီး နယ်နိမိတ်ဧရိယာထဲတွင် မပါဝင်သော ဆိုင်များကို ပိတ်သိမ်းခြင်းမရှိကြောင်း ဒေသခံအချို့က ပြောပါသည်။

“ဆိုင်းပုဒ်တွေတော့ ဖြုတ်ထားလိုက်ပါပြီ။ ဘာကြောင့်လဲဆိုတဲ့သေချာတဲ့အကြောင်းအရင်းတော့မသိရသေးပါဘူး။ ဆိုင်းပုဒ်တော့မတင်နဲ့အလုပ်တော့ဆိုင်ထဲမှာလုပ်လို့ရတယ်”ဟု မြဝတီမြို့ခံ တက်တူးဆိုင်ပိုင်ရှင် ကိုထက်ကျော်က ပြောသည်။ 

ဇွန်လ ၈ ရက်ရက်စွဲဖြင့် မြို့နယ်စည်ပင်သာယာနယ်နိမိတ်အတွင်း ဖွင့်လှစ်ခြင်း၊ လုပ်ငန်းလိုင်စင်များစည်းကြပ်ကောက်ခံခြင်းမပြုရန်နှင့် ဖွင့်လှစ်ထားသည့်ဆိုင်များကို သက်ဆိုင်ရာ ထွေအုပ်နှင့်မြန်မာနိုင်ငံရဲတပ်ဖွဲ့နဲ့အတူပိတ်သိမ်းရန် မြဝတီမြို့နယ်စည်ပင်က အမိန့်ထုတ်ပြန်ထားကြောင်းသိရသည်။ 

တက်တူးဆိုင်များသည် ဇွန်လ ၁ဝ နောက်ဆုံးထားပြီး ပိတ်သိမ်းရန်နှင့်လိုက်နာခြင်းမရှိပါက ကရင်ပြည် နယ် စည်ပင်သာယာအဖွဲ့မှ ဥပဒေအတိုင်း ဆောင်ရွက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။