NSS - ဇွန်  ၁၃

ရန်ကုန်တိုင်း သာကေတမြို့နယ်ရှိ ပြည်ထောင်စုတိုင်းရင်းသားကျေးရွာကို အဆင့်မြှင့်တင်ရန်အတွက် နိုင်ငံသားလုပ်ငန်းရှင်များကို အိတ်ဖွင့်တင်ဒါခေါ်သွားမည်ဖြစ်ကြောင်း တိုင်းရင်းသားစာပေနှင့်ယဉ်ကျေးမှုဦးစီးဌာနမှသိရသည် ။

၂ဝ၂၃-၂ဝ၂၄ ဘဏ္ဍာနှစ်အတွင်း တိုင်းရင်းသားကျေးရွာကို အဆင့်မြှင့်တင်သွားမည်ဖြစ်ပြီး တိုင်းရင်းသားကျေးရွာအတွင်းရှိ သမင်ခြံနေရာတွင် ဝင်္ကပါပတ်လမ်း၊ ဝါးရုံတောလျှောက်လမ်းများပြုပြင်ခြင်းနှင့် ရေပန်းအလှတပ်ဆင်သည့်လုပ်ငန်း‌များ၊ ဆိပ်ခံဗောတံတားအနီး သောင်တူးဖော်သည့်လုပ်ငန်းများဆောင်ရွက်သွားမည်ဖြစ်ကြောင်း သိရသည်။ 

အဆိုပါလုပ်ငန်းများကို ပြည်ထောင်စုခွင့်ပြုရန်ပုံငွေ၊ ငွေလုံးငွေရင်းအသုံးစရိတ်များဖြင့် ဆောင်ရွက်သွားမည်ဖြစ်ပြီး နိုင်ငံသားလုပ်ငန်းရှင်များကို တင်ဒါဖိတ်ခေါ်ထားကြောင်းသိရသည်။ 

တင်ဒါအဆိုပြုလွှာများကို ပြည်ထောင်စုတိုင်းရင်းသားကျေးရွာတွင် ဇွန်လ ၁၂ ရက်မှစတင်ကာရောင်းချပေးနေပြီး ဇွန်လ ၂၇ ရက် နောက်ဆုံးထားကာ ပြန်လည်ပေးပို့တင်သွင်းရမည်ဖြစ်ကြောင်း သိရသည်။

လက်ရှိအချိန်၌ ပြည်ထောင်စုတိုင်းရင်းသားကျေးရွာသို့ အပတ်စဉ်ရုံးဖွင့်ရက်များတွင် လူဦးရေ ၄ဝဝ မှ ၅ဝဝ အထိလာရောက်လည်ပတ်ကြပြီး ရုံးပိတ်ရက်များတွင် လူဦးရေ ၂ဝဝဝ ဝန်းကျင်အထိ လာရောက်ကြကြောင်းသိရသည်။