NSS - ဇွန် ၁၁

သရုပ်ဆောင် မေပန်းချီသည် ရာဇသတ်ကြီးပုဒ်မ ၅ဝ၅(က)ဖြင့် ထောင်ဒဏ်(၃)နှစ် ပြစ်ဒဏ်ချမှတ်ခြင်း ခံခဲ့ရကြောင်း သတင်းရရှိသည်။

မေပန်းချီကို ပြီးခဲ့သော ဇွန်လ ၇ ရက်တွင် စစ်ခုံရုံးက ထောင်ဒဏ်(၃)နှစ် ချမှတ်ခဲ့ခြင်းဖြစ်ကြောင်း လုံခြုံ ရေးအဖွဲ့ဝင်များနှင့်နီးစပ်သော သတင်းအရင်းအမြစ်က NP News ကို အသိပေးပြောဆိုထားသည်။

“ထောင်(၃)နှစ် ကျသွားတယ်ဆိုတာ မှန်ပါတယ်။ စစ်ခုံရုံးက ဇွန်လ ၇ ရက်မှာ အမိန့်ချမှတ်လိုက်တာပါ” ဟု အထက်ပါ သတင်းအရင်းအမြစ်က ပြောသည်။

၂ဝ၂၃ ခုနှစ် ဧပြီလ ၁၁ ရက်တွင် စစ်ကိုင်းတိုင်း၊ ကန့်ဘလူမြို့၊ ပဇီကြီးကျေးရွာ၌ NUG ရုံးဖွင့်ပွဲ ပြုလုပ်နေစဉ် လေကြောင်းတိုက်ခိုက်ခံရမှုဖြစ်စဉ်အပေါ် သရုပ်ဆောင်မေပန်းချီက ၎င်း၏ လူမှုကွန်ယက်စာမျက် နှာ၌ ရေးသားဖြန့်ဝေခဲ့မှုများနှင့်ပတ်သက်၍ အမှုဖွင့် ဖမ်းဆီးခံခဲ့ရခြင်းဖြစ်ကြောင်း သိရသည်။

အဆိုပါ ပဇီကြီးကျေးရွာ အကြောင်းအရာနှင့်ပတ်သက်၍ သရုပ်ဆောင်မေပန်းချီသည် ဧပြီလ ၁၁ ရက်တွင် ဒဂုံမြို့သစ်(မြောက်ပိုင်းမြို့နယ်)ရှိ သူမ၏နေအိမ်၌ ဖမ်းဆီးခံခဲ့ရပြီးနောက် ရာဇသတ်ကြီးပုဒ်မ ၅ဝ၅(က)ဖြင့် အမှုဖွင့်ခံခဲ့ရခြင်းလည်း ဖြစ်သည်။

ထို့ပြင် သရုပ်ဆောင် မေပန်းချီအပါအဝင် အဆိုတော်ရွှေရည်သိန်းတန်၊ လူငယ်အဆိုတော် မေလသံစဉ်နှင့် The Voice ဂျာနယ်အယ်ဒီတာချုပ်ဟောင်း ဦးကျော်မင်းဆွေတို့သည်လည်း ပဇီကြီးကျေးရွာဖြစ်စဉ်နှင့်ပတ်သက်၍ ဖမ်းဆီးအမှုဖွင့်ခြင်းခံခဲ့ရသည်။