NP News - ဇွန် ၁ဝ

စစ်ကိုင်းတိုင်း၊ မုံရွာနှင့် ဆာလင်းကြီးမြို့နယ်အစပ်ရှိ ညောင်ပင်ကြီးရဲစခန်းကို PDF ပူးပေါင်းအဖွဲ့များက ပစ်ခတ်တိုက်ခိုက်ခဲ့ပြီး နှစ်ဖက်အကြားတွင် ထိခိုက်သေဆုံးမှုများရှိခဲ့ကြောင်း သတင်းရရှိသည်။

ဖြစ်စဉ်မှာ ယမန်နေ့(ဇွန်လ ၉ ရက်)၊ ညနေ ၆ နာရီဝန်းကျင်အချိန်တွင် PDF ပူးပေါင်းအဖွဲ့က ညောင်ပင်ကြီးရဲစခန်းရှိ လုံခြုံရေးအဖွဲ့ဝင်များကို လာရောက်တိုက်ခိုက်ခဲ့ပြီး နှစ်ဖက်အကြားတွင် အပြန်အလှန်ပစ်ခတ်မှုများဖြစ်ပွားခဲ့ကြောင်း ဒေသခံများက NP News ကို ပြောသည်။

“မနေ့က ညနေ ၆ နာရီဝန်းကျင်လောက်က စဖြစ်တာပေါ့။ ပစ်ခတ်သံတွေကတော့ ညပိုင်း ၈ နာရီ၊ ၉ နာရီလောက်အထိ ကြားနေရတယ်။ မိုင်းကွဲသံတွေလည်း အများကြီးကြားရတယ်။ အခုဟာက PDF တွေက အင်အားများတယ်နဲ့တူတယ်။ အလုံးအရင်းနဲ့ ဝင်တိုက်တဲ့သဘောမှာရှိတယ်။ ရဲစခန်းကို စီးနိုင်သွားတယ်။ စခန်းမှာလည်း မီးလောင်နေတာတွေ တွေ့ရတယ်။ ဒေသခံအတော်တော်များများကတော့ ပြေးနေရတာပေါ့”ဟု အခင်းဖြစ်ပွားရာနေရာအနီးရှိ ဒေသခံတစ်ဦးက ပြောသည်။

PDF ပူးပေါင်းအဖွဲ့သည် ညောင်ပင်ကြီးရဲစခန်းအား အင်အားအလုံးအရင်းဖြင့် လာရောက်တိုက်ခိုက်ခဲ့ပြီးနောက် ၎င်းစခန်းကိုလည်း သိမ်းပိုက်သွားနိုင်ခဲ့ကြောင်း ဒေသခံများက ဆိုထားသည်။

ညောင်ပင်ကြီးရဲစခန်းအား PDF ပူးပေါင်းအဖွဲ့မှ ဝင်ရောက်စီးနင်းနေစဉ်အချိန်တွင် လုံခြုံရေးအဖွဲ့ဘက်က ဂျက်လေယာဉ်ဖြင့် လာရောက်ပစ်ခတ်မှုများရှိခဲ့ကြောင်း သိရသည်။

ထိုသို့ အပြန်အလှန်ပစ်ခတ်မှုဖြစ်စဉ်များအတွင်း PDF ပူးပေါင်းအဖွဲ့နှင့် လုံခြုံရေးအဖွဲ့ဝင်များအကြားတွင် သေဆုံးသူများ၊ ထိခိုက်ဒဏ်ရာရရှိသူများ ရှိခဲ့ကြောင်း ဒေသခံများက ဆိုသည်။

အဆိုပါ ညောင်ပင်ကြီးရဲစခန်းတိုက်ပွဲနှင့်ပတ်သက်၍ လုံခြုံရေးအဖွဲ့ဘက်မှ (၁ဝ)ဦးခန့် သေဆုံးခဲ့ပြီး စခန်းအား မီးရှို့ဖျက်ဆီးနိုင်ခဲ့ကြောင်းနှင့် လက်နက်ခဲယမ်းများကို သိမ်းဆည်းနိုင်ခဲ့ကြောင်း PDF အဖွဲ့များဘက်က ထုတ်ပြန်ထားသည်ကို တွေ့ရှိရပြီး ၎င်းအချက်အလက်များအပေါ် NP News အနေဖြင့် သီးခြားအတည်ပြုနိုင်ခြင်း မရှိသေးပေ။

နစက၏ သတင်းထုတ်ပြန်ရေးအဖွဲ့အနေဖြင့်လည်း ညောင်ပင်ကြီးရဲစခန်း တိုက်ခိုက်ခံရမှုနှင့်ပတ်သက်၍ လတ်တလော၌ တစ်စုံတစ်ရာထုတ်ပြန် အသိပေးခြင်းမျိုး မတွေ့ရသေးပေ။ 

ညောင်ပင်ကြီးရဲစခန်းသည် မုံရွာမြို့တစ်ဖက်ကမ်းတွင် တည်ရှိပြီး လက်ပံတောင်းတောင်ကြေးနီစီမံကိန်း ဝမ်ပေါင်ကုမ္ပဏီ အနီးတစ်ဝိုက်တွင် တည်ရှိကြောင်းလည်း သိရသည်။