NP News - ဇွန် ၅

ရန်ကုန်မြို့အတွင်းရှိ မြို့နယ်(၆)မြို့နယ်၌ သစ်ပင်သစ်ကိုင်းများအား ခုတ်ထွင်ရှင်းလင်းသွားမည်ဖြစ်၍ မနက်ဖြန်(ဇွန်လ ၆ ရက်)တွင် ယာယီလျှပ်စစ်ဓာတ်အား ပြတ်တောက်မည်ဖြစ်ကြောင်း သိရသည်။

ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ ယနေ့(ဇွန်လ ၅ ရက်)တွင် အထက်ပါကဲ့သို့ အသိပေးထုတ်ပြန်ထားခြင်းဖြစ်သည်။

ရန်ကုန်အရှေ့ပိုင်းခရိုင်နှင့် မြို့နယ်များမှ 66kV သာကေတ-ပုသိမ်ညွန့်ဓာတ်အားလိုင်းနှင့် မလွတ်ကင်းသော သစ်ပင်သစ်ကိုင်းများကို ခုတ်ထွင်ရှင်းလင်းသွားမည်ဖြစ်ကြောင်း သိရသည်။

အဆိုပါဆောင်ရွက်မှုများကို ဇွန်လ ၆ ရက်တွင် နံနက်(၉)နာရီမှ မွန်းလွဲ(၁)နာရီအချိန်အထိ ဆောင်ရွက်သွားမည်ဖြစ်ကြောင်း ထုတ်ပြန်ချက်အရသိရသည်။

ထို့ကြောင့် သကေတမြို့နယ်အပါအဝင် ဗဟန်းမြို့နယ်၊ တာမွေမြို့နယ်၊ မင်္ဂလာတောင်ညွန့်မြို့နယ်၊ ဒေါပုံမြို့နယ်နှင့် တောင်ဥက္ကလာပမြို့နယ်တို့ရှိ ရပ်ကွက်အချို့နှင့် စက်မှုဇုန်တို့တွင် ယာယီဓာတ်အားပြတ်တောက်မှုရှိမည်ဖြစ်ကြောင်း ထုတ်ပြန်ချက်အရ သိရသည်။

ထို့ပြင် အရေးကြီးနေရာများအား ဓာတ်အားပြတ်တောက်မှုမရှိစေရေးကို အလေးထားဆောင်ရွက်သွားမည်ဖြစ်ကြောင်း YESCမှ အသိပေးထုတ်ပြန်ထားသည်။