Pika (NP News) - ဇွန် ၃

ကုလသမဂ္ဂလုံခြုံရေးကောင်စီသည် ဆူဒန်နိုင်ငံသို့စေလွှတ်ထားသော ကုလသမဂ္ဂနိုင်ငံရေးမစ်ရှင်ကို နောက်ထပ်ခြောက်လ သက်တမ်းတိုးခဲ့ကြောင်း သတင်းထုတ်ပြန်ခဲ့သည်။

ကုလသမဂ္ဂအထူးသံတမန် Volker Perthes သည် ဆူဒန်ပဋိပက္ခကို ပိုမိုဆိုးရွားအောင် လုပ်ဆောင်နေခြင်းဖြစ်ကြောင်း ဆူဒန်စစ်တပ်အကြီးအကဲက စွပ်စွဲပြောဆိုခဲ့ပြီးနောက် ကုလသမဂ္ဂလုံခြုံရေးကောင်စီက ယင်းကဲ့သို့လုပ်ဆောင်ခဲ့ခြင်းဖြစ်ကြောင်းသိရသည်။ ဆူဒန်နိုင်ငံ၏ လက်ရှိအခြေအနေများကို ပိုမိုကောင်းမွန်ရန်ရည်ရွယ်ပြီး ကုလသမဂ္ဂ၏ ဘက်ပေါင်းစုံ အသွင်ကူးပြောင်းရေးမစ်ရှင် (UNITAMS)ကို (၂ဝ၂၃)ခုနှစ် ဒီဇင်ဘာလ(၃)ရက်အထိသက်တမ်းတိုးရန်  သဘောတူညီခဲ့ကြောင်းကုလသမဂ္ဂလုံခြုံ ရေးကောင်စီက သတင်းထုတ်ပြန်ထားသည်။

ဆူဒန်စစ်တပ်အကြီးအကဲ Abdel Fattah al-Burhan က ကုလသမဂ္ဂအထူးသံတမန် Volker Perthes သည် ပဋိပက္ခကို ပိုမိုဆိုးရွားလာအောင် တွန်းအားပေးနေကြောင်း ပြီးခဲ့သည့်သီတင်းပတ်ကစွပ်စွဲပြောဆိုခဲ့သည်။ ဆူဒန်စစ်တပ်အကြီးအကဲ Abdel Fattah al-Burhan က ကုလသမဂ္ဂအထူးသံတမန် Volker Perthes သည် ဆူဒန်နိုင်ငံတွင် ဖြစ်ပွားနေသော နိုင်ငံရေးဖြစ်စဉ်ကို ကူညီဆောင်ရွက်ပေးရာ တွင် လိမ်လည်မှုနှင့်မဟုတ်မမှန်သော သတင်းများကို ထုတ်ပြန်ခဲ့ခြင်းကြောင့် ၎င်း၏နေရာတွင် အစားထိုးပေးရန် ကုလသမဂ္ဂအထွေထွေအတွင်းရေးမှူးချုပ်ဂူတာရက်စ်ကို တောင်းဆိုခဲ့ကြောင်းသိရသည်။

သို့သော်လည်း ဂူတာရက်စ်က ၎င်းသည် အထူးသံတမန် Volker Perthes ကို ယုံကြည်ကြောင်း ပြော ဆိုခဲ့ပြီး အခြားကောင်စီအဖွဲ့ဝင်အများအပြားကလည်း ၎င်းကို ထောက်ခံအားပေးခဲ့ကြကြောင်းသိရသည်။ လာမည့် ခြောက်လသည် UNITAM မစ်ရှင်၏ စွမ်းဆောင်မှုများကို  အကဲဖြတ်ရန်လုံလောက်သော အချိန်တစ်ခုဖြစ်ကြောင်း ဗြိတိန်လက်ထောက်သံအမတ် James Kariuki က ပြောကြားခဲ့သည်။အမေရိကန်လက်ထောက်သံအမတ်ကြီးရောဘတ်ဝုဒ်က"ပဋိပက္ခအဆုံးသတ်ရေး၊ လူ့အခွင့်အရေးကာကွယ်မှုနဲ့ လူသားချင်းစာနာမှုဆိုင်ရာ အကူအညီတွေ ပိုမိုထောက်ပံ့ပေးနိုင်မယ့် မစ်ရှင်ကို လာမယ့်လတွေအတွင်းမှာ ကုလသမဂ္ဂလုံခြုံရေးကောင်စီက သဘောတူလိမ့်မယ်လို့ မျှော်လင့်မိပါတယ်"ဟုပြောဆိုခဲ့သည်။

ဇွန်လ(၂)ရက်က ချမှတ်ခဲ့သော ဆုံးဖြတ်ချက်တွင် ဆူဒန်နိုင်ငံရှိ ကုလသမဂ္ဂမစ်ရှင်နှင့်ပတ်သက်ပြီး  သုံးလတစ်ကြိမ် အစီရင်ခံစာတင်ပြရန် ကုလသမဂ္ဂအတွင်းရေးမှူးချုပ်က တောင်းဆိုထားသည်။