ရောင်နီ (NSS) - အောက်တိုဘာ ၃ဝ

          ရုရှားနိုင်ငံမှာ ယခုနှစ် ဩဂုတ်လ နှောင်းပိုင်းက လူမှုမီဒီယာမှာ ကျော်ကြားခဲ့တဲ့ လေးနှစ်သားအရွယ် (၁၇)ကီလိုဂရမ်နဲ့ ကြောင်လေး ခရောရှန့်ဟာ ဝိတ်လျှော့ဖို့ ကြိုးစားနေရင်း ခန္ဓာကိုယ်မှာ ကင်ဆာကြိတ်တွေ့ရှိခဲ့ပြီးနောက် မကြာခင် သေဆုံးသွားခဲ့တယ်လို့ တိရစ္ဆာန်ဆေးကုဆရာဝန်တွေက ပြောပါတယ်။ 

        ခရောရှန့်ဟာ ကိုယ်အလေးချိန် (၁၇)ကီလိုဂရမ်ရှိတဲ့ ကြောင်တစ်ကောင်ဖြစ်ပြီး ဖန်းမြို့ရှိ တိရစ္ဆာန်ခိုလှုံရေးစင်တာတစ်ခုမှာ ဝန်ထမ်းတွေရဲ့ အစားအသောက်နဲ့လေ့ကျင့်ခန်းတွေ သေချာပြင်ဆင် ဝိတ်လျှော့ပေးခြင်းကြောင့် အလေးချိန် ၃ ကီလိုဂရမ် နီးပါးလျော့ကျသွားခဲ့ပါတယ်။ ဒါပေမဲ့ အဝလွန်နေတဲ့ ပုံစံကြောင့် ကာတွန်းကြောင် ဂါဖီးရဲ့လက်တွေ့ဘဝ ပုံစံဖြစ်နေပြီး အောက်တိုဘာလ ၂၆ ရက်မှာ ရုတ်တရက် အသက်ရှူရခက်ခဲလာပြီး နာရီအနည်းငယ်အကြာမှာ သေဆုံးသွားခဲ့ပါတယ်။ 

          ခရောရှန့်ဟာ စွန့်ပစ်ကြောင်လေးဖြစ်ပြီး ဖန်းမြို့ရှိ ဆေးရုံတစ်ရုံရဲ့ မြေအောက်ခန်းမှာ ခိုလှုံနေထိုင်ခဲ့ရာမှ ဝန်ထမ်းတွေရဲ့ဘီစကွတ်နဲ့ စွပ်ပြုတ်ကျွေးမွေးမှုတွေကြောင့် ကိုယ်အလေးချိန် တဖြည်းဖြည်းတိုးလာခဲ့ပါတယ်။ နောက်ဆုံး လမ်းမလျှောက်နိုင်အောင် ဝဖြိုးလာတာကြောင့် ပြေးစက်ပေါ်မှာ လမ်းလျှောက်ခြင်း အပါအဝင် တင်းကျပ်တဲ့ အစား အသောက်နဲ့ လေ့ကျင့်ခန်းတွေနဲ့အတူ ဝိတ်လျှော့ပေးဖို့ ကြိုးပမ်းခဲ့ကြတာ ဖြစ်ပါတယ်။