ဂျန်ဇက် (NSS) - အောက်တိုဘာ ၂၄

အစ္စရေးနှင့်ဟားမတ်စ် အဖွဲ့ကြားအပစ်ခတ်ရပ်စဲရေးစောစီးစွာရနိုင်မည်ဆိုလျှင် ဒေသအတွင်းတင်းမာမှုများ ဖြေလျော့နိုင်မည်ဖြစ်ကြောင်း တရုတ် သမ္မတ ရှီကျင့်ဖျင်က BRICS ထိပ်သီးအစည်းအဝေးအတွင်း ထည့်သွင်းပြောဆိုလိုက်သည်။ 

တရုတ်သမ္မတသည် အဆိုပါထိပ်သီးအစည်းအဝေးအတွင်း အီရန် သမ္မတ နှင့်တွေ့ဆုံဆွေးနွေးချိန်တွင်း ယင်းကဲ့သို့ ထုတ်ဖော်ပြောဆိုလိုက်သည်။ ကမ္ဘာတဝန်းရှိနိုင်ငံများသည် အစ္စရေးနှင့် ဟားမတ်စ်အဖွဲ့ကြားဖြစ်ပွားနေသည့် စစ်ပွဲအဆုံးသတ်ရန်တောင်းဆိုနေပြီး အမေရိကန်နိုင်ငံခြားရေးဝန်ကြီး အန်တိုနီဘလီကန်ကလည်း ဂါဇာစစ်ပွဲအဆုံးသတ်ရန် နှင့် လက်ဘနွန်စစ်ပွဲအဆုံးသတ်ရန်သံတမန်ရေး နည်းလမ်းဖြင့် လုပ်ဆောင်နေသည်။  ဒေသအတွင်း နှင့် နိုင်ငံတကာအခြေအနေများ ပြောင်းလဲနေသော်လည်း အီရန်နိုင်ငံနှင့် မိတ်ဆွေအဖြစ်ပူးပေါင်းဆောင်ရွက်မှုများကို တိုးမြှင့်သွားမည်ဖြစ်ကြောင်းပြောသည်။ အီရန်နိုင်ငံသည် ဒေသအတွင်းနှင့်နိုင်ငံတကာတွင် သြဇာလွမ်းမိုးမှုရှိသောနိုင်ငံဖြစ်ပြီး တရုတ်နိုင်ငံနှင့် မိတ်ဆွေကောင်းဖြစ်သလို မိတ်ဖက်ကောင်းနိုင်ငံဖြစ်ကြောင်း ပြောသည်။ 

တရုတ်နိုင်ငံအနေဖြင့် အီရန်နိုင်ငံ၏အချုပ်အခြာ၊ လုံခြုံရေး၊ တည်ငြိမ်ရေးနှင်ဘေးကင်းများအတွက် ကူညီထောက်ပံ့ပေးသွားမည်ဖြစ်ကြောင်း၊ ပြောသည်။ အီရန် နိုင်ငံသည် လက်ရှိအချိန်တွင် BRICS အဖွဲ့ဝင်နိုင်ငံအဖြစ်ပါဝင်နေပြီးဂါဇာစစ်ပွဲ၊ လက်ဘနွန်စစ်ပွဲများနှင့် ဆက်နွယ်ကာ အစ္စရေးနိုင်ငံ နှင့် စစ်ရေးတင်းမာမှုများရှိနေကြောင်းသိရသည်။အီရန်သည် အောက်တိုဘာ ၁ရက်နေ့တွင်အစ္စရေးနိုင်ငံကို ဒုံးကျည်အစင်းပေါင်း ၂၀၀နီးပါးဖြင့်ပစ်ခတ်တိုက်ခိုက်ခဲ့ရာ အစ္စရေးနိုင်ငံက အီရန်ကို လက်တုံ့ပြန်ရန် စီစဉ်နေကြောင်းသိရသည်။