ဂျန်ဇက် (NSS) - အောက်တိုဘာ ၂၃

အိန္ဒိယ နှင့် တရုတ်နိုင်ငံတို့သည် နယ်စပ်ဒေသအငြင်းပွားမှုများနှင့်ပတ်သက်ပြီး သဘော တူညီမှုများ ရရှိခဲ့ကြောင်း သိရသည်။ အိန္ဒိယစစ်တပ် နှင့် တရုတ်စစ်တပ်တို့သည် ပိုင်နက်နယ်မြေအငြင်းပွားနေသည့် နယ်စပ်ဒေသတွင် မျက်နှာချင်းဆိုင်ပုံစံမျိုးရပ်တည်နေပြီး လက်ရှိအချိန်တွင်နှစ်နိုင်ငံကြား နယ်စပ်ဒေသကင်းလှည့်ရန်အတွက် သဘောတူညီခဲ့ကြောင်း သိရသည်။

တရုတ်နှင့်အိန္ဒိယနိုင်ငံတို့သည် အဆိုပါနယ်စပ်ဒေသအငြင်းပွားမှုများကို ဖြေရှင်းရန်အတွက် ပြီးခဲ့သော သီတင်းပတ်များအတွင်း သံတမန်ရေး၊ စစ်ရေးလမ်းကြောင်းများမှ တဆင့်တွေ့ဆုံဆွေးနွေးမှုမကြာခဏလုပ်ဆောင်ခဲ့ပြီးနောက် နယ်စပ်ဒေသတွင် Line of Actual Control (LAC)  နှင့်အညီ ကင်းလှည့်ရန် သဘောတူညီခဲ့ခြင်းဖြစ်သည်။ ထို့ပြင် အိန္ဒိယနှင့်တရုတ်တို့သည် နယ်စပ်ဒေသအငြင်းပွားမှုများ အပြီးသတ်သဘောတူညီမှုရရှိစေရန် ထပ်မံဆွေးနွေးရမည်ဖြစ်သည်။ အိန္ဒိယနှင့်တရုတ်နိုင်ငံတို့သည် မိုင်ပေါင်း (၂၁၀၀)ကျော် နယ်စပ်ချင်းထိစပ်နေပြီး နယ်စပ်ဒေသအငြင်းပွားမှုများကြောင့် ၂၀၂၀ ပြည့်နှစ်တွင် အပြန်အလှန်ပစ်ခတ်မှုများဖြစ်ပွားခဲ့ရာ အိန္ဒိယ စစ်သား (၂၀)ဦးသေဆုံးကာ တရုတ်စစ်သား (၄)ဦး သေဆုံးခဲ့ကြောင်း သိရသည်။ အဆိုပါအဖြစ်ပျက်ဖြစ်ပွားခဲ့ပြီးနောက်ပိုင်းတည်းက အိန္ဒိယစစ်တပ် နှင့် တရုတ်စစ်တပ်တို့သည် အငြင်းပွားနယ်စပ်ဒေသတွင် ပုံသေတပ်စွဲကာ တစ်ဖက်နှင့်တစ်ဖက် စောင့်ကြည့်နေခဲ့ကြောင်း သိရသည်။ 

တရုတ်နှင့် အိန္ဒိယတို့သည် နျူကလီးယားအင်အားကြီးနိုင်ငံများဖြစ်ရာ ၂၀၂၀ ပြည့်နှစ်ကအပြန်အလှန်ပစ်ခတ်မှုများဖြစ်လာခဲ့ပြီးနောက်ပိုင်း နှစ်နိုင်ငံကြား ဆက်ဆံရေးအေးစက်ခဲ့ပြီး စီးပွားရေး နှင့် သံတမန်ရေးတို့အပေါ် သက်ရောက်မှုများရှိလာခဲ့ကြောင်း သိရသည်။အိန္ဒိယနိုင်ငံက နိုင်ငံအတွင်းရှိ တရုတ်ရင်းနှီးမြှုပ်နှံမှုကို ကန့်သတ်ခြင်းများလုပ်ဆောင်ခဲ့ကြောင်းသိရသည်။ အိန္ဒိယ နှင့် တရုတ်အစိုးရသည် အပြန်အလှန်ပစ်ခတ်မှုများဖြစ်ခဲ့ပြီးနောက်ပိုင်း တင်းမာမှုများဖြေလျော့ရန် ဆွေးနွေးမှု အကြိမ်ပေါင်း (၃၀)လုပ်ခဲ့ရကြောင်းသိရသည်။