ဂျန်ဇက် (NSS) - အောက်တိုဘာ ၂၃

တရုတ် နှင့် ရုရှားနိုင်ငံတို့သည် မျှတသော ကမ္ဘာ့အစီအစဉ်များဖြစ်လာစေရန်အတွက် ပူး ပေါင်းဆောင်ရွက်မှုများကို တိုးမြှင့်လုပ်ဆောင်သွားမည်ဖြစ်ကြောင်း၊ BRICS အဖွဲ့ ထိပ်သီးအစည်းအဝေးအတွင်း ရုရှားသမ္မတပူတင် နှင့် တရုတ်သမ္မတရှီကျင့်ဖျင်တို့က ထုတ်ဖော်ပြောဆိုလိုက်သည်။

ရုရှား သမ္မတနှင့် တရုတ်သမ္မတတို့သည် ရုရှားနိုင်ငံ ကာဇန်မြို့တွင်ကျင်းပသော BRICS အဖွဲ့ ထိပ်သီးအစည်းအဝေးအတွင်း တက်ရောက်လာချိန်အတွင်း နားချိန်မှာတွေ့ဆုံဆွေးနွေးခဲ့ခြင်းဖြစ်ကြောင်း သိရသည်။ ရုရှားသမ္မတ ပူတင်က "ရုရှားနဲ့ တရုတ်နိုင်ငံကြားပူးပေါင်းဆောင်ရွက်မှုတွေဟာ ကမ္ဘာကြီးအခြေအနေတွေတည်ငြိမ်ရေးအတွက် အဓိကအရေးပါတဲ့အကြောင်းအရင်းတစ်ခုဖြစ်တယ်"ဟု မှတ်ချက်ပြုပြောဆိုခဲ့သည်။ 

BRICS အဖွဲ့ ထိပ်သီးအစည်းအဝေးကို အဖွဲ့ဝင်နိုင်ငံများအပြင် အခြားမိတ်ဖက်နိုင်ငံများလည်းတက်ရောက်ခဲ့ကြောင်းသိရသည်။ ရုရှားသမ္မတက"ကမ္ဘာ့လုံခြုံရေးနဲ့ မျှတဲ့ကမ္ဘာ့အစီအစဉ်များ ဖြစ်လာစေဖို့၊ ဘက်စုံပလက်ဖောင်းမှာ ပူးပေါင်းဆောင်ရွက်မှုတွေ 

နောက်ထပ်တိုးမြှင့်လုပ်ဆောင်ဖို့ ရည်ရွယ်ထားတယ်"ဟု ပြောသည်။ ထို့ပြင် တရုတ်သမ္မတ ရှီကျင့်ဖျင်ကလည်း ကမ္ဘာကြီးသည် လက်ရှိအချိန်တွင် ရာစုနှစ်အတွင်းမမြင်ခဲ့ဖူးသော အပြောင်းအလဲများဖြစ်ပွားနေကြောင်း၊ နိုင်ငံတကာအခြေအနေများက ဝရုန်းသုန်း ကားဖြစ်လာမည့် အခြေအနေများလည်းရှိလာနေပြီး ပြောင်းလဲလာနေခြင်းမျိုးဖြစ်ကြောင်း ပြောသည်။ တရုတ် သမ္မတက "တရုတ် နဲ့ ရုရှားနိုင်ငံကြား မိတ်ဆွေအဖြစ် ပူးပေါင်းဆောင် ရွက်မှုတွေကို လေးနက်စွာလုပ်ဆောင်မှာဖြစ်ပြီး ကမ္ဘာကြီးကို ကူညီပေးနိုင်အောင်အဓိကအရေးပါတဲ့နိုင်ငံဖြစ်အောင်၊ တာဝန်ယူတဲ့နိုင်ငံဖြစ်အောင်လုပ်ဆောင်မယ်"ဟု ပြောသည်။